म्याग्दी । तेस्रो ‘जेपिसी’ कप फुटबल प्रतियोगितामा आयोजक जनप्रिय मावि भूतपूर्व विद्यार्थी परिवार च्याम्पियन भएको छ ।
जिल्लाको मालिका गाउँपालिकाको केन्द्र दरवाङ बजारमा शनिबार भएको फाइलन खेलको निर्धारित ९० मिनेटको समयमा पश्चिम म्याग्दी युवा क्लब र जनप्रियका खेलाडीबाट एक÷एक गोल भएपछि खेल ‘ट्राइब्रेकर’मा धकेलिएको थियो । त्यस क्रममा एकका विरुद्ध दुई गोल गर्दै जनप्रिय परिवारले उपाधि जितेको हो ।
प्रतियोगिताको विजेता एक लाख ५१ हजार १११ र उपविजेतालाई रु ८१ हजार १११ सहित दुवै टोलीलाई ट्रफी, मेडल र प्रमाणपत्रसमेत प्रदान गरिएको आयोजक टोलीका संस्थापक सचिव रमेश पुनले जानकारी दिए ।
कार्यक्रममा मालिका गाउँपालिका अध्यक्ष बेगप्रसाद गर्बुजा र आयोजक टोलीका अध्यक्ष कुशल घर्तीलगायतले पुरस्कार वितरण गरेका थिए ।
जेपिसीका अञ्जन क्षेत्री उत्कृष्ट गोलरक्षक र हिराजित स्मृति क्लब अनुुशासित टोली बनेको छ । नयाँ वर्ष २०८३ का अवसरमा वैशाख १ गतेदेखि सुरु भएको प्रतियोगितामा २५ समूहले सहभागिता जनाएका थिए ।
