प्रमुख राजनीतिक दलका शीर्ष नेता भेटेर फर्किए ‘रअ’का प्रमुख गोयल, सत्ता राजनीतिमा प्रभाव पार्ने भ्रमणकाे उद्देश्य

काठमाडौँ । नेपालको सत्ता राजनीतिमा प्रभाव पार्ने उद्देश्यले हिजो अकस्मात काठमाडौँ आइपुगेका भारतीय गुप्तचर संस्था रिसर्च एण्ड एनालाइसिस विङ (रअ)का प्रमुख सामन्तकुमार गोयल महत्त्वपूर्ण राजनीतिक भेटघाट गरी आज बिहान स्वदेश फर्किएका छन् । भारतीय सेनाको विशेष विमानमार्फत बुधबार काठमाडौै उत्रिएका गोयल बिहीबार बिहान १० बजेर पाँच मिनेटमा फर्किएका हुन् ।

गोयलले बुधबार राति नै प्रधानमन्त्री केपी शर्मा ओलीसँग सरकारी निवास बालुवाटारमा भेटवार्ता गरेको प्रधानमन्त्रीका प्रेस सल्लाहकार सूर्य थापाले पुष्टि गरेका छन् । भेटका क्रममा उनले नेपाल भारतबीचकाे मैत्री सम्बन्ध खलबलिन नदिने, समस्याहरूकाे वार्ताद्वारा समाधान गर्ने र पारस्परिकक सहयाेगलाई निरन्तर अगाडि बढाउने विषयमा धारणा राखेकाे सल्लाहकार थापाले बताएका छन् ।

करिब दुई घण्टा लामो भेटमा भारतीय सेनाध्यक्ष मनोज मुकुन्द नरवाणेको कात्तिकमा हुने भनिएको नेपाल भ्रमणका बेला हुनसक्ने विरोध कार्यक्रमका बारेमा छलफल भएको स्राेतले नेपाल समाजलाई बतायाे । भारतीय पक्षले सेनाध्यक्षको भ्रमणका बेला विरोध कार्यक्रम भए सह्य नहुने आशय व्यक्त गरेको थियो ।

नेपाल बसाइका क्रममा गोयलले पूर्व प्रधानमन्त्रीद्वय माधवकुमार नेपाल तथा डा. बाबुराम भट्टराईसँग बेग्लाबेग्लै भेट गरेका थिए । नेपाल कम्युनिस्ट पार्टी (नेकपा) का कार्यकारी अध्यक्ष पुष्पकमल दाहालसँग पनि एक्लै भेटेको केही बेरमै उर्जामन्त्री वर्षामान पुन र नेता टोपबहादुर रायमाझी छलफलमा सहभागी भएका थिए ।

गोयलले जनता समाजवादी पार्टी (जसपा) नेपालका शीर्ष तहका नेता उपेन्द्र यादव, महन्त ठाकुर र राजेन्द्र महतोसँग संयुक्तरुपमा भेट गरेका थिए ।

सत्तारुढ नेकपाका र विपक्षी जसपाका वरिष्ठ नेताहरुसँग हाेटल द्वारिकामा भेटेका गोयलले नेपाली कांग्रेसका सभापति शेरबहादुर देउवालाई भने महाराजगंजमा गएर भेटेका थिए । देउवासँगकाे भेटमा नेता सशांक काेइराला पनि सँगै रहेकाे स्राेतले नेपाल समाजलाई बतायो ।

प्रधानमन्त्री कार्यालयबाट जारी प्रेस नाेटबाहेक बाँकी सबैले गाेयलकाे नेपाल भ्रमण र भेटघाटकाे विषय गाेप्य राखेका छन् ।

नेपालले लिपुलेक, कालापानी र लिम्पियाधुरा समेटेर नयाँ नक्सा जारी गरेपछि दुबै देशबीच कूटनीतिक मौनता रहेका बेला काठमाडौंमा एकाएक भारतीय गुप्तचर अधिकारीहरु सक्रिय भएका थिए ।