भारतमा स्वच्छ ऊर्जा विस्तार गर्न अमेजनले ७ अर्ब डलर लगानी गर्ने

भारत। अमेरिकी बहुराष्ट्रिय कम्पनी अमेजनले भारतमा स्वच्छ ऊर्जा उत्पादन विस्तार गर्न सन् २०३० सम्ममा सात अर्ब अमेरिकी डलर (करिब नौ खर्ब ८० अर्ब रुपैयाँ) लगानी गर्ने घोषणा गरेको छ ।

यस लगानीबाट भारतमा नवीकरणीय ऊर्जा उत्पादन क्षमता बढाउनुका साथै कम्पनीका सञ्चालनमा खपत हुने विद्युत्को कार्बन उत्सर्जन घटाउन सहयोग पुग्ने अपेक्षा गरिएको छ ।

भारतले सन् २०३० सम्म पाँच सय गिगावाट स्वच्छ ऊर्जा उत्पादन क्षमता पुर्‍याउने लक्ष्य राखेको छ । उक्त लक्ष्य हासिल गर्न करिब दुई खर्ब २० अर्ब अमेरिकी डलर लगानी आवश्यक पर्ने अनुमान छ ।

अमेजनले यसअघि नै भारतको नवीकरणीय ऊर्जा क्षेत्रमा चार अर्ब डलरभन्दा बढी लगानी गर्ने प्रतिबद्धता जनाइसकेको छ । कम्पनीले आफ्नो विद्यमान लगानी कार्यक्रमअन्तर्गत ९३४ मेगावाट विद्युत् उत्पादन क्षमता भएका चार नयाँ सौर्य तथा पवन ऊर्जा परियोजनासमेत घोषणा गरेको छ ।

अमेजनकी प्रमुख स्थायित्व अधिकारी कारा हस्र्टले भारतमा नवीकरणीय ऊर्जा क्षेत्रमा गरिएको लगानी दीर्घकालीन योजना र उद्योग क्षेत्रसँगको सहकार्यको परिणाम भएको बताएकी छन् । थप सात अर्ब डलरको लगानीले नयाँ सौर्य तथा पवन ऊर्जा परियोजना सञ्चालनमा ल्याउन सहयोग पुग्ने उनको भनाइ छ ।

यद्यपि, कम्पनीले नयाँ लगानी कुन परियोजनामा र कसरी खर्च गर्ने भन्ने विस्तृत विवरण सार्वजनिक गरेको छैन ।

भारतले पछिल्लो एक दशकमा स्वच्छ ऊर्जा विस्तारलाई तीव्रता दिएको छ । हाल भारतको कुल जडित विद्युत् उत्पादन क्षमताको ५४ प्रतिशतभन्दा बढी हिस्सा सौर्य, वायु तथा जलविद्युत्लगायत गैरजीवाश्म इन्धन स्रोतबाट प्राप्त हुने गरेको छ ।

बढ्दो विद्युत् माग पूरा गर्दै जलवायु परिवर्तनसम्बन्धी प्रतिबद्धता कार्यान्वयन गर्न भारतले नवीकरणीय ऊर्जा उत्पादन विस्तारलाई प्राथमिकता दिँदै आएको छ । अमेजनको पछिल्लो लगानी पनि आफ्नो विश्वव्यापी सञ्चालन, विशेषगरी डेटा सेन्टर तथा अन्य सुविधामा खपत हुने विद्युत्को कार्बन उत्सर्जन घटाउने रणनीतिको हिस्सा हो ।

Leave a Reply

Your email address will not be published. Required fields are marked *