काठमाडौं । फिफा विश्वकप-२०२६ को उपाधिका लागि आज साविक विजेता अर्जेन्टिना र सन् २०१० को विश्वविजेता स्पेन आमनेसामने हुँदैछन् । अमेरिकाको न्युयोर्क न्यु जर्सी स्टेडियममा हुने फाइनल नेपाली समयअनुसार राति १२:४५ बजे सुरु हुनेछ ।
अर्जेन्टिना लगातार दोस्रो तथा समग्रमा चौथो विश्वकप उपाधिको खोजीमा छ । यदि लियोनेल स्कालोनीको टोलीले उपाधि जित्न सफल भए, ब्राजिलले सन् १९५८ र १९६२ मा लगातार विश्वकप जितेपछि लगातार दुई संस्करणको विश्वकप जित्ने पहिलो पुरुष टोली बन्नेछ । यसअघि इटालीले १९३४ र १९३८ मा लगातार उपाधि जितेको थियो ।
अर्जेन्टिनाको सफल यात्रामा कप्तान लियोनेल मेस्सी फेरि एकपटक मुख्य आकर्षण बनेका छन् । ३९ वर्षीय मेस्सीले सात खेलमा आठ गोल गर्दै चार असिस्ट दिएका छन् । सेमिफाइनलमा इंग्ल्याण्डविरुद्ध २-१ को पुनरागमन जितमा उनले दुई असिस्ट गर्दै टोलीलाई फाइनल पुर्याउन महत्वपूर्ण भूमिका खेलेका थिए ।
मेस्सी हाल आठ गोल र चार असिस्टसहित गोल्डेन बुटको दौडको दोस्रो स्थानमा रहेका छन् । फ्रान्सका किलियन एम्बाप्पेले पनि दस गोल गोलसहित शीर्ष स्थानमा रहेका छन् ।
अर्जेन्टिनाले यस विश्वकपमा हालसम्म सबै खेल जितेको छ । समूह चरण सहज रूपमा पार गरेको अर्जेन्टिनाले नकआउट चरणमा भने केप भर्डे, इजिप्ट, स्विट्जरल्यान्ड र इंग्ल्याण्डलाई कठिन प्रतिस्पर्धापछि पराजित गर्दै फाइनल यात्रा तय गरेको हो ।
यता, प्रशिक्षक लुइस डे ला फुएन्तेको नेतृत्वमा रहेको स्पेन प्रतियोगिताको सबैभन्दा सन्तुलित टोलीका रूपमा देखिएको छ । सात खेलमा बेल्जियमविरुद्ध मात्र एक गोल बेहोरेको स्पेनको रक्षापंक्ति निकै बलियो देखिएको छ ।
स्पेनले पहिलो खेलमा केप भर्डेसँग गोलरहित बराबरी खेलेपछि साउदी अरेबियालाई ४-०, उरुग्वेलाई १-० ले हराउँदै समूह विजेताका रूपमा अघि बढेको थियो । त्यसपछि राउन्ड अफ ३२ मा अस्ट्रियालाई ३-०, अन्तिम १६ मा क्रिस्टियानो रोनाल्डोको पोर्चुगललाई १-०, क्वाटरफाइनलमा बेल्जियमलाई २-१ तथा सेमिफाइनलमा फ्रान्सलाई २-० ले पराजित गर्दै फाइनलमा स्थान बनाएको हो ।
स्पेनका लागि मिकेल ओयार्जाबालले पाँच गोल गर्दै टोलीका सर्वाधिक गोलकर्ता बनेका छन् भने १९ वर्षीय स्टार लामिन यामालले एक गोल गरे पनि आफ्नो प्रभावशाली प्रदर्शनबाट सबैको ध्यान तानेका छन् ।
फाइनलले अन्तर्राष्ट्रिय फुटबलमा पहिलो पटक लियोनेल मेस्सी र लामिन यामाललाई आमनेसामने उभ्याउनेछ । साथै, वर्तमान दक्षिण अमेरिकी च्याम्पियन अर्जेन्टिना र वर्तमान युरोपियन च्याम्पियन स्पेनबीचको यो भिडन्तलाई विश्व फुटबलको सबैभन्दा ठूलो प्रतिस्पर्धाका रूपमा हेरिएको छ ।
हेड-टु-हेड
स्पेन र अर्जेन्टिनाबीच अहिलेसम्म १४ पटक प्रतिस्पर्धा भएको छ । दुवै टोलीले समान ६-६ खेल जितेका छन् भने दुई खेल बराबरीमा सकिएका छन् ।
विश्वकपमा भने उनीहरूबीच एकपटक मात्र भेट भएको छ । सन् १९६६ को समूह चरणको खेलमा अर्जेन्टिनाले स्पेनलाई २-१ ले पराजित गरेको थियो ।
दुवै टोलीबीचको पछिल्लो भेट सन् २०१८ मा भएको मैत्रीपूर्ण खेलमा भएको थियो, जहाँ म्याड्रिडमा इस्कोको ह्याट्रिकको मद्दतमा स्पेनले अर्जेन्टिनामाथि ६-१ को फराकिलो जित निकालेको थियो । अब आठ वर्षपछि यी दुई फुटबल महाशक्ति विश्वकपको सबैभन्दा ठूलो मञ्चमा उपाधिका लागि भिड्न लागेका छन् ।
