मकवानपुर । बागमती प्रदेशका नवनियुक्त मुख्यमन्त्री किरण थापामगरले प्रदेशसभाबाट विश्वासको मत प्राप्त गरेका छन् ।
मंगलबार प्रदेशसभामा भएको मतदानमा मुख्यमन्त्री थापामगर पेस गरेको विश्वासको मतको प्रस्तावको पक्षमा ५७ मत परेको हो । उनको पक्षमा सत्ता साझेदार नेकपा (एमाले) का २४, नेपाली कम्युनिष्ट पार्टीका २६ र राप्रपाका सात जना प्रदेशसभा सदस्यले मतदान गरेका थिए ।
प्रदेशसभा बैठकमा ३६ सिट रहेको नेपाली काङ्ग्रेस, तीन सिट रहेको नेपाल मजदुर किसान पार्टी (नेमकिपा) र दुई सिट रहेको हाम्रो नेपाली पार्टी (हानेपा) भने अनुपस्थित रहेकाले विपक्ष र तथस्टमा शून्य मत रहेको प्रदेशसभा सचिवालयका सचिव रामकुमार पौडेलले जानकारी दिए ।
मुख्यमन्त्री थापामगर ४ भदौमा प्रदेशसभाका ६३ जना प्रदेशसभा सदस्यको समर्थनमा मुख्यमन्त्री नियुक्त भएका थिए । बागमती प्रदेशसभा सचिवालयका कानुन उपसचिव तथा प्रवक्ता प्रकाश चापागाईँका अनुसार मुख्यमन्त्री थापामगरले नेपालको संविधानको धारा १६८ को उपधारा (४) तथा बागमती प्रदेशसभा नियमावली, २०७४ को नियम १४३ बमोजिम विश्वासको मत प्राप्त गरेका हुन् ।
एमाले, नेकपा र राप्रपाको समर्थनमा मुख्यमन्त्री नियुक्त हुनुभएका थापालाई विश्वासको मत दिनका लागि सत्ता साझेदार एमाले र नेकपाले ह्वीप जारी गरेको थियो ।
सरकार निर्माणमा समर्थन तथा सहभागिताका विषयलाई लिएर राप्रपामा भने विवाद सिर्जना भएको थियो । आन्तरिक विवादकै कारण १२ सिट रहेको राप्रपाका ६ सदस्यले मात्रै विश्वासको पक्षमा मत दिए भने अन्य सदस्य बैठकमा अनुपस्थित रहे ।
