मस्को । सिरियाली राष्ट्रपति अहमद अल–शाराले मस्कोमा रूसी नेता भ्लादिमिर पुटिनसँग भेटवार्ता गरेका छन् । भेटमा क्रेमलिनले मध्यपूर्वमा आफ्नो सैन्य निगरानीका लागि महत्त्वपूर्ण सैन्य अड्डाहरूको भविष्य सुरक्षित गर्न सम्झौताका लागि सहमति गर्न चाहेको छ ।
सिरियामा १४ वर्ष लामो रक्तपातपूर्ण गृहयुद्धका बेला रुस शाराका पूर्ववर्ती बशर अल–असदको प्रमुख सहयोगी थियो ।
शाराको विद्रोही सेनाको हातबाट असदको पतनले यस क्षेत्रमा रूसको प्रभावमा ठूलो धक्का लागेको छ। सिरियामा रहेका रूसी विशालसैन्य अड्डाहरूको स्थिति के रहने भन्नेमा प्रश्न उठेको छ।
पुटिनले त्यसयता शारासँग सम्बन्ध निर्माण गर्न काम गरिरहेको पाइन्छ, यद्यपि रुसले असद र उनकी पत्नीलाई मस्कोमा आश्रय दिइरहेको सम्बन्ध सुधारका लागि ठूलो अवरोध बनेको छ ।
“हाम्रो अन्तरदेशीय सम्बन्ध पुनस्र्थापना गर्ने सन्दर्भमा धेरै काम भएको छ,” पुटिनले शारासँगको टेलिभिजन बैठकमा भने ।
सिरियाको उत्तरपूर्वी क्षेत्रमा कुर्द सेनाविरुद्ध शाराको हालैको आक्रमणलाई सङ्केत गर्दै पुटिनले भने, “हामीले सिरियाको क्षेत्रीय अखण्डता पुनस्र्थापना गर्ने तपाईंको प्रयासलाई नजिकबाट नियालेका छौँ र यो प्रक्रियाले प्राप्त गरेको गतिका लागि म तपाईंलाई बधाई दिन चाहन्छु ।”
सत्तामा आएपछि पुटिनसँगको दोस्रो भेटवार्तामा शाराले सिरियाको एकता र स्थायित्वमा मात्र नभई सम्पूर्ण क्षेत्रमा रुसको ऐतिहासिक भूमिका रहेको बताए ।
