चीनलाई संवेदनशील सैन्य सूचना दिएको अभियोगमा अमेरिकी जलसेनाका एक कर्मचारीलाई दुई वर्षभन्दा बढीको जेल सजाय सुनाइएको छ। उनी चिनियाँ मूलका अमेरिकी नागरिक हुन् ।
२६ वर्षीय वेन्हङ झाओले पैसा लिएर चिनियाँ गुप्तचर निकायलाई त्यस्तो सूचना दिएको आरोप गत अक्टोबरमा स्वीकार गरेका थिए । उनी अमेरिकी जलसेनाको क्यालिफोर्नियास्थित एउटा शिविरमा निम्न तहका कर्मचारी थिए ।
अमेरिकी अधिकारीहरूका वेन्हङ झाओले सन् २०२१ देखि सन् २०२३ को बीचको अवधिमा सैन्य अभ्यास, गतिविधिसम्बन्धी आदेश र संवेदनशील पूर्वाधारबारे सूचना बेचेका थिए ।
विशेष गरी उनले अमेरिकी जलसेनाले इन्डो–प्यासिफिक क्षेत्रमा ठूलो स्तरमा गर्न लागेको अभ्यासबारे सूचना चिनियाँ गुप्तचर निकायलाई दिएका थिए । त्यसबाहेक जापानको ओकिनावा टापुस्थित अमेरिकी शिविरमा रहेको रेडार प्रणालीको विद्युतीय चित्र र ‘ब्लूप्रिन्ट’ अर्थात् खाका पनि उनले दिएका थिए । ओकिनावामा अवस्थित अमेरिकी जलसेनाको शिविरलाई एशियामा अमेरिकी कारबाहीको महत्त्वपूर्ण स्रोत मानिन्छ ।
तर अमेरिकी अधिकारीहरूले अरू देशका जलसैनिक अभ्यासबारे सूचना चुहिएको कुनै सङ्केत दिएका छैनन् । वेन्हङ झाओसँग ‘सुरक्षा क्लिअरन्स’ थियो अर्थात् उनीसँग निषेधिक क्षेत्रमा पनि जान पाउने अनुमति थियो।
निषेधित मानिएका सैनिक र जलसैनिक पूर्वाधारमा प्रवेश गरेर उनले संवेदनशील सूचना सङ्कलन र अभिलेख गरेको अमेरिकी न्याय मन्त्रालयले जनाएको छ । सन् २०२१ को अगस्टदेखि सन् २०२३ को मेसम्ममा उनलाई १४ पटक पैसा दिइएको र त्यस क्रममा उनले कम्तीमा १४ हजार ८६६ डलर प्राप्त गरेको भनिएको छ ।
