पेरिस । फ्रान्सका राष्ट्रपति इमानुएल म्याक्रोंले पेरिसनजिकै भएको गोली प्रहारको घटनालाई ‘नस्लवादी आतंकवादी हमला’ भनेका छन्। उक्त घटनामा एक जनाको मृत्यु भएको छ भने अन्य पाँच जना घाइते भएका छन्।
म्याक्रोंले यो घटना फ्रान्सेली गणतन्त्र र राष्ट्रको जीवनमा एउटा ‘निर्णायक मोड’ भएको बताए। यसअघि फ्रान्समा यसरी अनियमित रूपमा कसैलाई उसको जातीय पृष्ठभूमिका आधारमा हत्या गरिएको घटना कहिल्यै नभएको उनको भनाइ छ।
घटना करिब १५ मिनेटसम्म चलेको थियो। आक्रमणकारीले आफ्नो कारबाट गोली चलाउँदै सुरुमा पेरिसको दक्षिणपश्चिममा पर्ने ट्राप क्षेत्रमा र त्यसपछि नजिकैको ला भेरियर क्षेत्रमा आक्रमण गरेको थियो। आक्रमणकारीले आप्रवासी पृष्ठभूमिका मानिसहरूलाई लक्षित गरेको देखिएको छ। घटनापछि उनलाई पक्राउ गरिएको थियो।
घाइतेमध्ये १२ वर्षीया बालिकासहित तीन जनाको अवस्था अझै गम्भीर रहेको छ । घटनास्थल ट्राप पुगेका म्याक्रोंले पीडितहरूलाई उनीहरूको छालाको रङ वा धर्मका आधारमा लक्षित गरिएको बताए। उनले समाजमा जरा गाड्दै गएका यस्ता ‘विचारधारा’ का अगाडि एक इन्च पनि पछि नहट्न सर्वसाधारणलाई आग्रह गरे।
आक्रमणको वास्तविक उद्देश्य अझै स्पष्ट हुन सकेको छैन। तर, फ्रान्सको राष्ट्रिय आतंकवादविरोधी अभियोजन कार्यालय (पीएनएटी) ले यो घटना ‘आतंकवादी गतिविधिसँग सम्बन्धित हत्या’ जस्तो देखिएको जनाएको छ।
फ्रान्सेली सञ्चारमाध्यमले संदिग्धको नाम केभिन टी (३९) रहेको उल्लेख गरेका छन्। पीएनएटीका अनुसार उनीमाथि यसअघि चार पटक दोषसिद्धि भएको थियो, तर ती अभिलेख स्वतः मेटिएका थिए।
स्थानीय सञ्चारमाध्यमका अनुसार उनी प्रहरीको निगरानीमा परिचित व्यक्ति भए पनि फ्रान्सेली गुप्तचर निकायको निगरानीमा थिएनन्। राष्ट्रिय आतंकवादविरोधी अभियोजन कार्यालयले बीएफएमटिभीलाई बताएअनुसार उनी फ्रान्सको राष्ट्रिय सुरक्षाका लागि गम्भीर खतरा मानिएका व्यक्तिहरूको सूचीमा पनि थिएनन्।
पीएनएटीले संदिग्धको निकट परिवारका एक सदस्यलाई पनि शुक्रबार नियन्त्रणमा लिइएको जनाएको छ।
ट्रापका मेयर अली राबेहले शुक्रबार बिहान एक व्यक्तिले आफ्नो गाडीबाट बाटोमा भेटिएका विभिन्न मानिसमाथि गोली चलाएको बताए।
प्रहरी युनियनका एक अधिकारीका अनुसार संदिग्धलाई ला भेरियरमा सहर हुँदै जाने मुख्य एन–१० सडकमा पक्राउ गरिएको थियो।
