काठमाडौँ । लुम्बिनी लायन्सका कप्तान रोहितकुमार पौडेलले नेपालका क्रिकेट खेलाडीको वृत्तिविकासका लागि नेपाल प्रिमियर लिग (एनपिएल) महत्वपूर्ण प्लेटफर्म भएको बताएका छन् ।
एनपिएलअन्तर्गत बिहीबार आफ्नो पहिलो खेलमा चितवन राइनोजलाई पराजित गरेपछि सञ्चारकर्मीसँग कुरा गर्ने क्रममा उनले प्रतियोगिताका कारण धेरै नेपाली खेलाडीले लाभ लिने बताए ।
कप्तान पौडेलले यो संस्करणमा जीतसँगै सुरुवात भएकाले आत्मबल बढेको उल्लेख गरे । ‘पहिलो खेलमा विदेशी खेलाडीले पनि राम्रो प्रदर्शन गरे, यसका लागि दुई’तीन महिनादेखि नै काम भइरहेको थियो, स्वदेशी र विदेशी खेलाडीबीच समन्वय भएमा नतिजा सकारात्मक निस्कन्छ’, उनले भने ।
त्यसैगरी, उनले नेपालमै फ्लडलाइटमा खेल्ने सपना पनि पूरा भएको बताए । उनले भने, ‘फ्लडलाइटमा खेल्ने हाम्रो सपना एनपिएलमार्फत पूरा भएको छ, विदेशमा फ्लडलाइटमा खेल्न सुरुमा समस्या हुन्थ्यो, अब हामीलाई सहज हुन्छ ।’
एनपिएलमा विदेशी खेलाडी पनि रहेको र उनीहरूबाट नेपाली खेलाडीहरूले सिक्नुपर्नेमा उनले जोड दिए । उनले भने, ‘नेपाली खेलाडीसँग सीप छ भने विदेशी खेलाडीसँग सीप र अनुभव दुवै छ, हामीले उनीहरुबाट धेरै कुरा सिक्न सक्छौँ ।’
चितवन राइनोजका रवि बोपराले नेपालमा फ्लडलाइट र प्याराफिट बनेकामा खुसी व्यक्त गरे । इङ्गल्याणडका बोपरा पहिलो संस्करणमा पनि चितवन राइनोजबाट एनपिएल खेलेका थिए ।
