काभ्रे । काभ्रेको पनौती नगरपालिका–१२, रोशीमा एक महिलाको हत्या भएको छ । प्रहरीका अनुसार, ३० वर्षीया मनीषा तामाङको हत्या भएको हो ।
मनीषाको हत्या उनकै श्रीमान् सन्तबहादुर तामाङले गरेको आशंका प्रहरीले गरेको छ । वडा अध्यक्ष जयराम केसीका अनुसार, हत्यापछि महिलाको शव घरनजिक खाल्डोमा गाडिएको अवस्थामा फेला परेको छ । सन्तबहादुर जेनजी आन्दोलनका क्रममा नख्खु कारागारबाट भागेर केही दिनअघि मात्रै घर पुगेका थिए ।
तर, हाल उनी फरार छन् । उनी चार वर्षअघि करणी मुद्दामा नख्खु कारागार पुगेका थिए । सन्तबहादुर र उनकी श्रीमतीबीच जेलबाट फर्किएपछि झगडा भएको स्थानीयले प्रहरीलाई बताएका छन् । प्रहरीले थप अनुसन्धान गरिरहेको जनाएको छ ।
