इलाम । पर्यटन प्रवर्द्धन गर्ने उद्देश्यले इलाममा ‘रेडपाण्डा म्याराथन’ प्रतियोगिता हुने भएको छ । अन्तरराष्ट्रिय रेडपाण्डा दिवसका अवसरमा आगामी असोज ४ गते इलाम सदरमुकामदेखि नेपाल–भारत सीमाक्षेत्र सन्दकपुर डाँडासम्म म्याराथन गर्न लागिएको आयोजक दीपज्योति युवा क्लबका कार्यक्रम निर्देशक राम रिमालले जानकारी दिए ।
रेडपाण्डा नेटवर्क र सन्दकपुर गाउँपालिकाको सहयोगमा दीपज्योति युवा क्लबले म्याराथन प्रतियोगिता आयोजना गर्न लागेको हो । पुरुष र महिलातर्फका म्याराथनअन्तर्गत धावक इलाम सदरमुकामस्थित चोक बजार (एक हजार १२० मिटर उचाइ) बाट सन्दकपुर डाँडा (३ हजार ६१० मिटर उचाइ) सम्म ४४.२ किलोमिटर दूरीमा दोडने छन् ।
प्रतियोगितामा नेपाली सेना, सशस्त्र प्रहरी, नेपाल प्रहरीसहित देशभरका १०० बढी धावक सहभागी हुनेछन् । प्रतियोगिताका पुरुष र महिलातर्फ छुट्टाछुट्टै पहिलो हुनेले १ लाख ५० हजार रुपैयाँ, दोस्रो हुनेले १ लाख रुपैयाँ, तेस्रो हुनेले ५० हजार रुपैयाँ र चौथो हुनेले ३० हजार रुपैयाँ प्राप्त गर्ने आयोजक दीपज्योति युवा क्लबले जनाएको छ ।
त्यसैगरी, स्थानीय विधातर्फ इलाम, पाँचथर र ताप्लेजुङका धावकका लागिसमेत छुट्टै प्रतियोगिता हुनेछन् । पुरुष र महिलातर्फका पहिलो हुनेले २५ हजार रुपैयाँ, दोस्रो हुनेले २० हजार रुपैयाँ, तेस्रो हुनेले १० हजार रुपैयाँ र चौथो हुनेले ५ हजार रुपैयाँ पाउनेछन् ।
“जिल्लाको पूर्वाधार विकासँगै पर्यटन प्रवर्द्धन गर्न म्याराथन प्रतियोगिता आयोजना गर्न लागेका हौँ”, दीपज्योति युवा क्लबका कार्यक्रम निर्देशक रिमालले भने, “रेडपाण्डा दिवसका अवसरमा रेडपाण्डा नै पाइने क्षेत्रमा आयोजना गरिएको कार्यक्रमले यहाँको पर्यटन विकासमा थप टेवा पुर्याउने विश्वास लिएका छौँ ।”
लोपोन्मुख रेडपाण्डा (हाब्रे) संरक्षण, खेलकुद र पर्यटन प्रवर्द्धनका लागि आयोजना हुने ‘रेडपाण्डा म्याराथन’ मा नेपालका राष्ट्रिय तथा अन्तरराष्ट्रिय धावककोसमेत सहभागिता रहने रेडपाण्डा नेतवर्कका कार्यक्रम निर्देशक वाङ्चु भुटियाले जानकारी दिए ।
म्याराथन प्रतियोगिताका लागि सन्दकपुर गाउँपालिकाले रुटअन्तर्गतको सडक मर्मतको काम सुरु गरेको अध्यक्ष तुलाराम गुरुङले बताए । “पर्यटन प्रवर्द्धन गर्ने उद्देश्यले हाम्रै पालिकामा म्याराथन प्रतियोगिता हुँदैछ, त्यसका लागि हामीले सडक मर्मत सुरु गरेका छौँ”, अध्यक्ष गुरुङले भने, “यसले सन्दकपुर गाउँपालिकाको मात्र नभई समग्र इलामको पर्यटन विकासमा सहयोग पुग्नेछ ।”
सन्दकपुर–२ मा पर्ने सन्दकपुर डाँडा इलामको सबैभन्दा अग्लो उचाइ ३ हजार ६३६ मिटर उचाइमा पर्छ । सन्दकपुर डाँडाबाट सूर्योदयको दृश्यावलोकनसँगै विभिन्न चार देश नेपाल, भारत, भुटान र चीनका हिमाल देख्न सकिन्छ ।
