काठमाडौँ । नेपाली कांग्रेसको संस्थापनइतर समूहको राष्ट्रिय भेलाले पाँचबुदे निर्णय गरेको छ । आइतबार समापन भएको भेलाले पार्टीको १५औँ महाधिवेशन १४औँ महाधिवेशनबाट निर्वाचित केन्द्रीय कार्यसमितिको निर्णय र आयोजनामा सम्पन्न गर्ने निर्णय गरेको छ ।
राष्ट्रिय भेलाले पार्टी सभापति शेरबहादुर देउवाको सभापतित्वमा नै १५औँ महाधिवेशन सम्पन्न हुने विश्वास व्यक्त गरेको छ । १५औँ महाधिवेशन सम्पन्न नभएसम्म पार्टीका नियमित गतिविधि सभापतिको निर्देशनमा राष्ट्रिय भेला तथा सम्मेलनका संयोजकले संयोजन गर्दै अघि बढाउने निर्णयसमेत गरिएको छ ।
भेलाले मुलुकको वर्तमान अवस्थालाई ध्यानमा राख्दै राष्ट्रिय तथा लोकतन्त्रवादी शक्तिहरूसँग संवाद गरेर राष्ट्रियता र लोकतन्त्रको सुदृढीकरणका लागि सक्रिय रहने जनाएको छ । २०३३ सालमा महामानव बीपी कोइरालाले राष्ट्रिय संकटलाई ध्यानमा राख्दै राष्ट्रिय एकता तथा मेलमिलापको नीति लिएर स्वदेश फर्किएको प्रसंग उल्लेख गर्दै अहिले पनि मुलुक अप्ठ्यारो अवस्थामा रहेकाले संवाद र सहकार्य आवश्यक रहेको निष्कर्ष सम्मेलनले निकालेको छ ।
त्यस्तै, नेपालको सनातनदेखि चलिआएको धर्म तथा संस्कृतिलाई राष्ट्रिय पहिचानका रूपमा अघि बढाउने प्रतिबद्धता पनि सम्मेलनले जनाएको छ । धार्मिक सहिष्णुता, सामाजिक सद्भाव तथा प्रत्येक व्यक्ति र धार्मिक समुदायको धार्मिक स्वतन्त्रता सुनिश्चित गर्दै हिन्दू, बौद्ध, किरात र प्रकृतिसहितका परम्परागत धर्म–संस्कृतिको संरक्षणमा जोड दिने निर्णय गरिएको छ ।
वर्तमान संविधानमा जनअपेक्षाअनुसार आवश्यक संशोधन गर्न संविधानमै रहेको व्यवस्थाअनुसार सम्बन्धित सबै पक्षसँग संवाद गरी निकास खोज्ने निर्णय पनि भेलाले गरेको छ । भेलाम प्रस्तुत विभिन्न प्रस्ताव तथा सुझावलाई समेटेर परिमार्जित प्रस्तावको लिखित दस्तावेज तयार गर्ने जिम्मेवारी केन्द्रीय सदस्य एनपी साउदको संयोजकत्वमा गठित समितिलाई दिइएको छ ।
समितिमा केन्द्रीय सदस्य उमाकान्त चौधरी र सीता राना सदस्य तथा केन्द्रीय सदस्य मीनबहादुर विश्वकर्मा र दीपकप्रसाद कुइकेल सहयोगी रहनेछन् ।
