काठमाडौँ । श्रम संस्कृति पार्टीले संसदमा रक्षामन्त्रीको खोजी गरेको छ । शुक्रबारको प्रतिनिधिसभा बैठकमा श्रम संस्कृति पार्टीका अध्यक्ष हर्क साम्पाङले सुस्ता क्षेत्रमा भारतीय सीमा सुरक्षा बल (एसएसबी) ले गरेको व्यवहारप्रति आपत्ति जनाउँदै रक्षामन्त्रीलाई ‘रुलिङ’ गरेर सदनमा बोलाउन माग गरेका हुन् ।
उनले भारतीय सीमा सुरक्षा बालले नेपालमा आएर हप्कीदप्की गर्दै गरेको भिडियो आएको भन्दै यसको बास्तविकता रक्षामन्त्रीले जानकारी गराउनुपर्ने बताए ।
उनले भने, ‘म प्रश्न राख्न चाहन्छु, नेपाल सरकारको अहिले रक्षा मन्त्री को हुनुहुन्छ ? रक्षा मन्त्रीलाई सभामुखले बोलाइदिनुपर्छ । उहाँलाई म प्रश्न सोध्न चाहन्छु, यो सुस्ता भन्ने ठाउँमा भारतीय पक्षको एसएसबी (सशस्त्र सीमा बल) आएर नेपाली दाजुभाइहरूलाई हप्कीदप्की गर्दै गरेको र नेपाली दाजुभाइहरू आफ्नो भूमिको लागि लड्दै, भिड्दै गरेको अवस्थाका भिडियोहरू सार्वजनिक भएका छन् ।’
उनले उक्त घटनाप्रति नेपाल सरकार र रक्षा मन्त्रालयको गम्भीर ध्यान जानुपर्ने आवश्यकता औंल्याए । प्रधानमन्त्री संसदमा उपस्थित नभएको अवस्थामा रक्षा मन्त्रीलाई बोलाएर सीमासम्बन्धी विषयमा जवाफ दिनुपर्ने उनको माग थियो ।
उनले भने, ‘यसतर्फ नेपाल सरकारले र रक्षा मन्त्रीले ध्यान दिनुपर्यो । संसदमा प्रधानमन्त्री त आउनुहुन्न, रक्षा मन्त्री छन् भने खोजेर ल्याइदिनुपर्याे ।’
उनले सीमामा नेपाली सेना तैथान नगर्न कुनै करारपत्र वा सन्धि केही गरेको भए संसदमा देखाउन माग गरे ।
