भक्तपुर । सूर्यविनायक नगर खेलकुद विकास समितिले आयोजना गरेको ‘सूर्यविनायक मेयरकप जिल्लास्तरीय फुट्सल प्रतियोगिता–२०८३’ शुक्रबारदेखि सुरु भएको छ ।
सूर्यविनायक नगरपालिकाको सहयोगमा सूर्यविनायक नगरपालिका–८ हेल्दी फुटसलमा सुरु भएको प्रतियोगितामा जिल्लाभरिबाट २८ वटा टिमबीच प्रतिस्पर्धा भएको सूर्यविनायक नगर खेलकुद विकास समितिका सदस्यसचिव दीपक थापाले जानकारी दिए ।
वैशाख २६ गते शनिबार सम्पन्न हुने प्रतियोगिताको नगरपालिकाका उपप्रमुख सरिता तिम्सिना भट्टराईले उद्घाटन गरिन् । कार्यक्रमका सभापति एवं नगरपालिका सामाजिक विकास शाखाका प्रमुख तथा नगरपालिकाका प्रवक्ता रवीन्द्र सापकोटाले नगरपालिकाले खेलकुदको विकासका लागि निःशुल्क प्रशिक्षणदेखि प्रतियोगिता गर्दै आएको भन्दै युवाहरूलाई खेलमा आकर्षित गरी राष्ट्रिय तथा अन्तर्राष्ट्रिय खेलाडी उत्पादन गर्न लागिरहेको बताए ।
कार्यक्रममा समितिका सदस्यसचिव दीपक थापाले २६ गते शनिबार नगरप्रमुख वासुदेव थापाद्वारा प्रतियोगितामा प्रथम हुने टिमलाई नगद ६० हजार पुरस्कारसहित शिल्ड, मेडल र प्रमाणपत्र प्रदान गरिने बताए ।
प्रतियोगितामा दोस्रो हुने टिमलाई ३० हजार, तेस्रो हुने टिमलई २० हजार, सान्त्वना हुने टिमलाई १० हजार नगद, शिल्ड, मेडल र प्रमाण प्रदान गरिने उहाँले बताउनुभयो । उच्च अर्थात् सबभन्दा बढी गोलकर्तालाई १० हजार नगद पुरस्कारसहित मेडल र प्रमाणपत्र प्रदान गरिने उनले जानकारी दिए ।
