न्होम पेन्ह। कम्बोडियामा साइबर ठगी, मनी लन्ड्रिङ र डिजिटल भुक्तानी प्रणालीसँग जोडिएको विवाद चर्किँदै जाँदा प्रधानमन्त्री हुन मानेटका एक भाइ (काकाका छोरा) ले सम्बन्धित कम्पनीमा आफ्नो प्रत्यक्ष हिस्सेदारी रहेको स्वीकार गरेका छन्।
बुधबार जारी वक्तव्यमा हुन टोले आफूले हुयोन पे पीएलसीमा ३० प्रतिशत सेयर स्वामित्व राखेको स्पष्ट पारे। यसले प्रकरणलाई थप राजनीतिक र आर्थिक चासोको विषय बनाएको छ।
अमेरिकी सरकारले गत वर्ष हुयोन समूहमाथि गम्भीर आरोप लगाउँदै उक्त समूह अन्तर्गतका कम्पनीहरूले दक्षिणपूर्व एसियाबाट सञ्चालन हुने ठगी गतिविधिबाट प्राप्त रकमलाई अन्तर्राष्ट्रिय आपराधिक सञ्जालमार्फत वैध देखाउने काम गरेको दाबी गरेको थियो।
ई–कमर्स, भुक्तानी सेवा र क्रिप्टोकरेन्सी कारोबारमा सक्रिय यो समूहअन्तर्गतको हुयोन पे विशेष रूपमा विवादमा तानिएको थियो। वक्तव्यमा हुन टोले आफूले स्वामित्व स्वीकार गरे पनि कम्पनीको दैनिक व्यवस्थापन वा सञ्चालनमा कुनै भूमिका नरहेको उल्लेख गरेका छन्। साथै उनले उक्त कम्पनीबाट अहिलेसम्म कुनै नाफा, लाभांश वा आर्थिक फाइदा नलिएको दाबी गरेका छन्।
यसैबिच, चिनियाँ मूलका ली जियोङलाई अप्रिल १ मा चीन सुपुर्दगी गरिएको थियो। उनी हुयोन समूहका पूर्वअध्यक्ष हुन्। चिनियाँ अधिकारीहरूका अनुसार ली एक ठूलो अन्तर्राष्ट्रिय जुवा तथा ठगी सञ्जालका प्रमुख पात्रमध्ये एक रहेको र विभिन्न आपराधिक गतिविधिमा संलग्न रहेको आशङ्का गरिएको छ।
रिच्स एन्ड पार्टनर्स नामक लिक्विडेटर संस्थाको प्रतिवेदनअनुसार लीसँग हुयोन पेमा ६२ प्रतिशत सेयर स्वामित्व थियो भने हुन टोको हिस्सेदारी ३० प्रतिशत रहेको उल्लेख गरिएको छ। सोही प्रतिवेदनमा कम्पनीको बन्द गर्ने प्रक्रिया अक्टोबर २०२५ मा सम्पन्न भएको जानकारी दिइएको छ।
यता, गत महिनादेखि सर्वसाधारण प्रयोगकर्ताहरूले हुयोन प्लेटफर्म अन्तर्गतको एच–पे (पहिले हुयोन पे) मा आफ्नो खाताहरू फ्रिज भएको भन्दै विरोध प्रदर्शन गर्दै आएका छन्। उनीहरूले डिसेम्बरदेखि प्लेटफर्ममा पहुँच नपाएको गुनासो गर्दै आफ्ना रकम फुकुवा गर्न माग गरेका छन्।
कम्बोडियाको केन्द्रीय बैंकले भने उक्त प्लेटफर्मको व्यवसाय सञ्चालन इजाजतपत्र खारेज गरिसकेको जनाएको छ, जसले सम्पूर्ण प्रकरणलाई थप जटिल र संवेदनशील बनाएको छ।
