महेन्द्रनगर । महेन्द्रनगरमा आयोजित सुदूरपश्चिम प्रदेशस्तरीय बाह्रसिङ्गा व्याडमिन्टन प्रतियोगिताको उपाधि धनगढीका राजेन्द्रबहादुर बम र राम बोहराको जोडीले जितेको छ ।
पश्चिमपाटीद्वारा आयोजित प्रतियोगिताको ‘बी लेभल’तर्फको फाइनल खेलमा भोजराज भट्ट र गणेश मिश्रको जोडीलाई पराजित गर्दै बम र बोहराको जोडीले ४४ हजार ४४४ रुपैँया नगद पुरस्कारका साथमा, ट्रफी/मेडलसहित उपाधि जितेको हो । त्यसैगरी उपविजेता भोजराज भट्ट र गणेश मिश्रको जोडीले नगद २२ हजार २२२ रुपैयाँ नगद, ट्रफी र प्रमाणपत्र प्राप्त गरेको प्रतियोगिता संयोजक शेरबहादुर सिंहले बताए ।
यसैगरी प्रतियोगिताको ‘बी लेभल’तर्फ कमलसिंह भाट र विवेक ऐर, जीवन खड्का र अमित शाहको जोडीले तृतीत स्थान हासिल गरे । उनीहरुले समान ११ हजार १११ रुपैयाँ नगद, ट्रफी र प्रमाणपत्र प्राप्त गरे । त्यसैगरी प्रतियोगितामा ४५ वर्ष उमेर समुह माथिको भेट्रानतर्फ धनगढीकै भोजराज भट्ट र वीरेन्द्रसिंह विष्टको जोडीले उपाधि जितेको छ ।
फाइनल खेलमा सुरेन्द्र कार्की र शैलेन्द्र श्रेष्ठको जोडीलाई पराजित गर्दै भट्ट र विष्टको जोडीले १५ हजार ५५५ रुपैयाँ नगद, ट्रफीसहित उपाधि जितेको हो ।
उपविजेता बनेको कार्की र श्रेष्ठको जोडीले सात हजार ५५५ रुपैयाँ नगद, ट्रफी र प्रमाणपत्र प्राप्त गरेको छ । प्रतियोगितामा तेस्रो हुने प्रेम चन्द, पदम ठकुराठीको जोडी र सुरेन्द्रप्रसाद भट्ट, ईश्वरी दत्त भट्टको जोडीलाई पाँच हजार ५५५ रुपैयाँ नगद ट्रफी र प्रमाणपत्रसहित पुरस्कृत गरिएको छ । प्रतियोगिताको दुवै विधामा गरी ८० टिम सहभागी थिए ।
