काठमाडौं । पूर्वमन्त्री गोविन्दराज जोशीको भ्रष्टाचार मुद्दामा सर्वोच्च अदालतले ११ वर्षपछि आगामी साउन १३ मा फैसला सुनाउने भएको छ । आइतबार सर्वोच्चका न्यायाधीशद्वय विनोद शर्मा र बालकृष्ण ढकालको इजलासले निर्णय सुनाउने मिति तोकेको हो ।
सर्वोच्चका सूचना अधिकारी गोविन्दप्रसाद घिमिरेका अनुसार असार २१ गतेसम्म दुवै पक्षलाई बहस नोट पेश गर्न भनिएको छ । ११ वर्षमा ५१ पटक सुनुवाइका लागि पेशीमा चढेर पनि मुद्दा फैसला भएको थिएन ।
विशेष अदालतले २०६९ सालमा जोशीलाई दोषी ठहर्याएको थियो । दुई करोड १६ लाख १४ हजार ३७६ रूपैयाँ बराबरको सम्पतिको स्रोत पुष्टि हुन नसकेपछि विशेष अदालतले जोशीलाई दोषी ठहर गरेको थियो ।
विशेष अदालतको निर्णय विरूद्ध उनी २०७० सालमा सर्वोच्च अदालत गएका थिए। शुरूमा विशेष अदालतले हदम्यादको गुज्रेको भन्दै जोशीलाई सफाइ दिएको थियो।
तर अख्तियारले हदम्यादको व्याख्या गरिदिन भन्दै सर्वोच्चमा रिट लिएर गएपछि फैसलामा गम्भीर विचलन देखिएको भन्दै पुनः सुनुवाइ गर्न भनेको थियो । त्यसपछि जोशी दोषी ठहर भएका हुन् सर्वोच्चले मागेको एउटा कागज नै अख्तियारले उपलब्ध नगराएपछि यो मुद्दा लामो समय थन्किएको थियो ।
