काठमाडौं । विभिन्न क्षेत्रका २० महिला संयुक्तरूपमा अन्नपूर्ण आधार शिविर जाने भएका छन् । आन्तरिक पर्यटन प्रवद्र्धन गर्ने उद्देश्यका साथ उनीहरुले एबिसी आधार शिविर जाने तयारी गरेका हुन् ।
साथसाथै नामक संस्थाले आफ्नै देशको पर्यटन क्षेत्रलाई आर्थिकरूपमा बलियो बनाउन र विश्वमा नेपाललाई पर्यटकीय क्षेत्रका रूपमा चिनाउन यो काम थालनी गर्न लागेको हो । दशदिने अन्नपूर्ण आधार शिविर यात्रामा निस्कने उक्त टोली यही असोज ११ गते काठमाडौँबाट प्रस्थान गर्नेछ । अन्नपूर्ण यात्राका लागि विभिन्न क्षेत्रमा आवद्ध २० महिला छन् ।
संस्थाका अध्यक्ष प्रजिता कार्कीका अनुसार पछिल्लो समय कोभिडले पर्यटन क्षेत्रलाई निकै तहसनहस पारेकाले स्वदेशी पर्यटनलाई बढावा दिन यात्रा तय गरिएको हो । उनले भनिन्, “अब विदेशी पर्यटन क्षेत्र होइन, नेपालमै भएका पर्यटन क्षेत्रलाई विकास गर्नुपर्छ, साथै आम नेपालीले पनि स्वदेशमा भएका पर्यटकीय क्षेत्रको अवलोकन गरुन् भन्ने मनसाय पनि हो ।”
संस्थाले यहाँ आयोजना गरेको कार्यक्रममा वरिष्ठ क्याप्टेन विजय लामाले एबिसी आधार शिविर जान लागेका महिला टोलीलाई सफलताको शुभकामना व्यक्त गर्दै कोभिड महामारीको जोखिमपूर्ण समयमा पनि पर्यटन क्षेत्रलाई प्रवद्र्धन गर्ने उद्देश्यले महिलाले हिम्मत गर्नु चानचुने विषय नभएको बताए ।
उनले स्वदेशी पर्यटनलाई प्रवद्र्धन गर्न महिला अग्रसर भएकामा आफूलाई निकै खुसी लागेको बताए । संस्थाले एबिसी आधार शिविरमा गएर पर्यटन क्षेत्रलाई प्रवद्र्धन गर्ने उद्देश्यले सन्देशमूलक कार्यक्रमसमेत गरिने जनाएको छ ।
