काठमाडौं। ‘हामी विश्वास दिलाउन चाहन्छौं, हामी बदलिनेछौं, नेपाली कांग्रेसलाई बदल्नेछौं। राष्ट्रिय राजनीतिमा प्रमुख भूमिकाका साथ पार्टीलाई नयाँ उचाइमा पुर्याउनेछौं।’ नेपाली कांग्रेसका केन्द्रीय सदस्यहरू चन्द्र भण्डारी, धनराज गुरुङ, विश्वप्रकाश शर्मा, गुरुराज घिमिरे, गगनकुमार थापा, प्रदीप पौडेल र बद्री पाण्डेले २०७४ पुस १५ गते जारी गरेको संयुक्त विज्ञप्तिको अंश हो यो।
कांग्रेसले प्रतिनिधि र प्रदेशसभा निर्वाचनमा पराजय भोगेपछि आएको यो विज्ञप्तिले पार्टीमा नयाँ तरंग ल्यायो। गुटबन्दीले थिलोथिलो बनेको कांग्रेसलाई युवा नेताहरू मिलेर अघि बढाउनेछन्, साँच्चै पार्टीलाई बदल्नेछन् भन्ने आशा धेरै नेता कार्यकर्ताले गरे।
पार्टी नेतृत्वका कारण निर्वाचनमा पार्टी पराजित भएको बुझाइमा रहेका उनीहरूले पहिलो पुस्तालाई सम्मानपूर्वक बिदा गर्नुपर्ने भन्दै विशेष महाधिवेशनका पक्षमा वकालत गर्न थाले। ‘एज’ होइन ‘अजेन्डा’ को वकालत गर्दै आएका पार्टीका सात भाइमध्येका एक विश्वप्रकाश शर्मा त्यसको १० दिनपछि पार्टी प्रवक्ताको जिम्मेवारीमा पुगे। २०७४ कात्तिकमा सभापति शेरबहादुर देउवाले प्रवक्ता नियुक्तिका लागि तयार पारेको पत्र बीचमै नरोकिएको भए उक्त जिम्मेवारीमा गगन थापा हुने थिए।
प्रवक्ताको जिम्मेवारीसँगै शर्माको भूमिका बदलियो। सभापति देउवाको विरोध होइन, बचाउ गर्ने जिम्मेवारीमा पुगेका शर्मा सात भाइबाट अलग भए। बाँकी ६ भाइ निर्वाचनको समीक्षासहित विशेष महाधिवेशन हुँदै अर्ली महाधिवेशन, महासमिति बैठकको मागतिर अघि बढे।
युवाका नाममा कांग्रेसभित्र विभिन्न गुट र समूह सक्रिय भए तर उनीहरूबीच एकता कायम रह्यो। निर्वाचन भएको झन्डै ६ महिनापछि सभापति देउवाले समीक्षाका लागि केन्द्रीय समिति बैठक राखे। बैठकमा ६ भाइले ५१ पृष्ठको धारणा राखे भने शर्माले छुट्टै प्रस्ताव। पार्टीका अन्य केन्द्रीय सदस्य र युवा नेताले आआफ्नो प्रतिवेदन पेस गर्ने होड नै चल्यो।
६ भाइ कांग्रेस केन्द्रीय सदस्यले पुराना मान्छेको स्वाभाविक बहिर्गमन र नयाँ मान्छेको आगमन नहुनाले अजेन्डा, विचार र क्षमताको दृष्टिले पार्टी जमेको पोखरीजस्तो भएको जिकिर गरे। ‘पार्टीको चुस्त संगठन चलाउन प्रस्ट सैद्धान्तिक खाका त कोर्यौं तर त्यसलाई चलाउने नेतृत्व शिथिल र यथास्थितिवादी छ भने संगठनमा गतिशीलता कसरी आउँछ’ भन्ने प्रश्न गर्दै उनीहरूले प्रतिवेदनमा लेखेका छन्, ‘त्यसैले अहिलेकै नेतृत्वको निरन्तरता खोज्नु जनादेश र मतादेशलाई नबुझ्नु नै हो।’
तर उनीहरूको कुरालाई केन्द्रीय समितिले सुनेन। विशेष वा अर्ली महाधिवेशन होइन, नियमित महाधिवेशन पनि समयमा हुन सकेन। संवैधानिक समयसीमा पनि गुजारेर महाधिवेशनको तयारी हुँदा पार्टीलाई बदल्ने संकल्प गरेका तिनै युवा बदलिएका छन्। पार्टीको पहिलो पुस्ताका नेतामाथि दबाब खडा गर्न चार वर्षमा विभिन्न भाइका नाममा युवा नेताले विज्ञप्ति जारी गरे।
तर पार्टीको १४औं महाधिवेशनको सँघारमा आइपुग्दा सात भाइबाट सुरु भएको अभियान अहिले छिन्नभिन्न हुन पुगेको छ। यति बेला उनीहरू ७० काटेका र ८० टेक्न लागेका नेता र नेतृत्वको फेरो समाएर आगामी महाधिवेशनमा आफ्नो भविष्य खोज्न लागिपरेका छन्। नागरिक दैनिकबाट
