देशमा अस्थिरता चाहनेले जनता भड्काउन थालेः मन्त्री भट्ट

  • 1
    Share

धनगढी । उद्योग वाणिज्य तथा आपूर्तिमन्त्री लेखराज भट्टले अहिलेकै सरकारले समृद्धिको यात्रा तय गर्ने बताएका छन् । शनिबार कैलालीको लम्कीचुहामा लम्की–टीकापुर–खक्रौला सडकको शिलान्यास कार्यक्रमलाई सम्बोधन गर्दै उनले विगतका सरकारभन्दा अहिलेको सरकार विकास र समृद्धिको लागि अनवरतरूपमा लागिपरेको बताए ।

मन्त्री भट्टले जनताको आशा÷भरोसाअनुसारका काम गर्न जनताको सरकार लागिपरेको बताउँदै सरकार कुनै पनि हालतमा नढल्ने र जनताका चाहनाबमोजिम काम गर्नेमा शङ्का नगर्न आग्रह गरे । हिजो देखेका सपना साकार गर्न तल्लीन रहेकाले केही समयमा सरकारका काम देखिने बताउँदै उनले यही सरकारको परिकल्पनामा निर्माणको क्रममा रहेका राष्ट्रिय गौरवका आयोजनाको काम सकिएर सञ्चालनमा आएपछि जनताले पनि सरकारको कामको गर्वका साथ प्रशंसा गर्ने दाबी गरे ।

जनताले मत दिएर आफ्नो जिम्मेवारी पूरा भएको नसोची सरकारका गतिविधिमा चनाखोका साथ सल्लाह, सुझाव तथा सहभागिता देखाउनुपर्नेमा जोड दिदैं मन्त्री भट्टले राज्यले परिकल्पना गरेका औद्योगिक क्षेत्र, बाटाघाटा, सुक्खा बन्दरगाह तथा बहुप्रतिक्षित पूर्वपश्चिम रेलमार्ग सञ्चालनका लागि पनि राज्य तदारुकताका साथ लागिरहेकाले यही सरकार समृद्धि यात्राको पाइलट भएको बताए ।

देश अब औद्योगिक युगमा प्रवेश गर्ने बताउँदै उनले सरकारले राम्रो काम गरेको देख्न नचाहने र देशमा अस्थिरता चाहनेले जनता भड्काउन तल्लीन रहेको दाबी गरे ।

मन्त्री भट्टले पार्टीमा देखिएका केही समस्याका कारण नेकपा फुट्छ भनेर खुशी मनाउन तयार भएकालाई दुई अध्यक्षले निरास बनाउनुहुन्न भन्ने कुरामा आफू ढुक्क भएको बताउँदै नेकपा कुनै पनि हालतमा नफुट्ने दाबी गरे ।

भौतिक पूर्वाधार तथा यातायात मन्त्री वसन्तकुमार नेम्वाङले गफ गरेरभन्दा काम गरेर अघि बढ्ने कुरामा विश्वास राख्ने अहिलेको सरकार भएको बताउँदै प्रधानमन्त्री केपी शर्मा ओलीकै पालामा देश विकासशील देशको सूचीमा पर्ने र त्यसैको थालनी स्वरुप विकास आयोजनाका काम अघि बढेको बताए ।

उनले लम्की–टीकापुर–खक्रौला सडक निर्माण कम्पनीले समयावधिभित्रै सक्नुपर्नेमा जोड दिदैं सरकार कुनै पनि बहाना सुन्ने अवस्थामा नरहेको बताए । मन्त्री नेम्वाङले पश्चिममा गड्डाचौकीदेखि चिसापानीसम्म चार लेनको सडकको आवश्यकता रहेको उल्लेख गर्दै यसको प्रक्रिया अघि बढाएमा आफूबाट पूरा सहयोग रहने विश्वास व्यक्त गरे ।

उनले जनताले प्राप्त गरेको यो स्थायी सरकार अहिले सुखी नेपाली, समृद्ध नेपालको अभियान बोकेर अघि बढेको बताउँदै जनताले दिएको पाँच वर्षको समयावधिमा यो सरकार समृद्धि यात्रामा अघि लम्कने विश्वास व्यक्त गरे ।

 


  • 1
    Share

Leave a Reply

Your email address will not be published. Required fields are marked *