ढोरपाटन बाढी : ३५ बढी बेपत्ता, १२ जनाको शव फेला (पछिल्लाे अपडेट)

बागलुङ । यसवर्षको मनसुन उत्तराद्र्ध लाग्दै गर्दा बागलुङ जिल्लाको ढोरपाटन नगरपालिकाकाका विभिन्न क्षेत्रमा भुजी खोलाले अकल्पनीय क्षति पुर्याएको छ ।

दुई दिनदेखि लगातार भारी वर्षा हुँदा खहरेसहित उर्लेर आएको भुजी खोलाले यहाँका तीन दर्जन बढी घर बगाएको छ । भारी वर्षा हुँदा ठूलो क्षति पुर्याउँछ भन्ने अनुमान लगाउँदा लगाउँदै जिल्लाले नसोचेको परिणाम बेहोरेको ढोरपाटन नगरपालिकाका उपप्रमुख करमती पुन मगर बताउँछिन् ।

प्राप्त विवरण अनुसार अहिलेसम्म बाढीमा परेर ३५ बढी व्यक्ति बेपत्ता छन् । अन्य १२ जनाको शव फेला परेको छ । जिल्ला प्रशासन कार्यालयका सूचना अधिकारी धीरेन्द्रराज पन्तले पाहुना आएकासमेत परेको बुझिएकाले उद्धार र विवरण सङ्कलनको काम जारी रहेको जानकारी दिए ।

सबै क्षेत्र बगरमा परिणत भएकाले बस्ती कुन ठाउँमा थियो भनेर यकिन गर्न नसकिने अवस्था रहेको उनले बताए । उपप्रमुख मगरले भनिन्, “बस्तीको नामो निशाना देखिँदैन, अहिले पनि बस्ती भएर खोला बगिरहेको छ, सबै सोहोरेर लगेको छ ।” सडक, कुलो, गाउँबस्ती सबै क्षतविक्षत भएको उनले बताइन् ।
ठाउँठाउँमा पहिरोसमेत खसेको छ । उहाँले खोला थुनिएर फुटेपछि भीषण बाढीको रुप लिएको अनुमान गर्नुभयो । तर कुन ठाउँमा भएको हो त्यो यकिन भने हुन सकेको छैन । गाउँ क्षेत्रमै भएका प्रहरी र सेनासहित स्थानीयवासीले उद्धार कार्य जारी राखेका छन् ।

जिल्लाको टोली केहीबेर अघि मात्रै पुगेको छ । प्रमुख जिल्ला अधिकारी सुरेश न्यौपानेले सडक बाटो सबै भत्काएकाले हिँडेर घटनास्थल पुगेको बताए । बुर्तिवाङ्बाट ढोरपाटनका लागि सवारीसाधन चल्ने सडक बाढी र पहिरोले क्षतविक्षत भएको उनले जानकारी दिए । “केही प्रहरी, सेना तथा टोलवासीले उद्धार गरिरहेका छन्, हामीसँग उद्धारका लागि थप टोली छ, उद्धारकार्य प्रभावकारी बनाएका छौँ”,प्रजिअ न्यौपानेले भने । राहतसहित लिएर गएको गृहमन्त्रीसहितको टोलीसमेत घटनास्थल पुग्न नसकेकाले फर्किएको छ ।

घटनास्थलमा प्रत्यक्ष पुग्नुभएका उपप्रमुख मगरले ढोरपाटन भन्दा तल्लो भेगको खोला किनाराका बस्तीमा क्षति भएको बताइन् । उनले यहाँको वडा–९ पूर्ण प्रभावित भएको र वडा नं ६,७, ८ मा समेत क्षति पुगेको बताइन् । धेरै मानवीय क्षति– ९ मा भएको छ । मुख्यगरी यहाँको फल्लेघर, सुपराङ, भुसुन्डे, सिदु, बगालेघर (घट्टबास), दुनापढेरा, लाखुरीबोटमा बढी क्षति भएको छ । खनेको नयाँ बाटोबाट निस्किएको लेदोसहित पहिरो खस्दा ठाउँठाउँमा सडक विग्रिएको छ । “लाँकुरीबोटको अवस्थ हेर्दा बस्ती पूरै बगर बनेकाले कुन ठाएँमा बस्ती थियो भन्नेसमेत पत्ता लगाउन सकिँदैन”, उपप्रमुख मगरले भनिन् ।
कुनै शव टाउको नभएको, कुनै हात नभएको, कसैको कम्बर नभएको अवस्थामा यत्रतत्र शरीरका अङ्ग बगरमा देखिएको उहाँले बताउनुभयो । “अकल्पनीय घटना भएको छ, यस्तो घटनानी हुन्छ र भन्ने अवस्था छ, पीडादायी अवस्थालाई शब्दमा भन्न सकिँदैन”, मगरले दुःख पोख्दै भनिन् ।

घटरा मध्यरातको हो । अविरल वर्षापछि भुजी खोला यसरी बस्तीमा पसेको हो । उक्त खोलमा अन्य खहरे र ठाडो खोलासमेत मिसिदा ठूलो रुप लिन पुगेको हो । सबै सुतेको बेला घटना भएकाले पनि बढी मानवीय क्षति भएको छ । दायाँबायाँ लछार्दै लगेपछि मानिसको राति नै भागाभाग भएको थियो । केही संयोगले बाँचे भने सुतिरहेका धेरै बगेका थिए । राति घटना हुँदा कतिले ऐयासमेत भन्न नपाएको स्थानीयवासीले बताएका छन् ।

जल तथा मौसम विज्ञान विभागका मौसमविद् मञ्जु बासी मौसम र भौगोलिक अवस्थाले बागलुङमा जस्ता धेरै घटना बेहोरिएको बताउँछिन् । “ठूलो वर्षा हुने नदेखाए पनि सानो क्षेत्रमा थोरै समयमा पनि धेरै पानी परेको हो”, उनले भनिन् । उनले सो क्षेत्रमा अघिल्लो दिन पानी परेको र त्यसको भोलिपल्ट मङ्गलबार पनि पानी परेको बताइन् । मौसमविद् सविना शाक्यका अनुसार ढोरपाटन नजिक राति बुर्तिवाङ् क्षेत्रमा ४१ मिलिमिटर पानी परेको देखिएको छ । यसपटक बाढी पहिरोका कारण ३१७ जनाको मृत्यु भइसकेको छ । बढी पहिरोले क्षति पुर्याएको छ ।

Leave a Reply

Your email address will not be published. Required fields are marked *