जेरुसेलम । इजरायलको निर्वाचन आयोगले गत साता सम्पन्न निर्वाचनमा धाँधली भएको कुनै प्रमाण फेला नपरेको जनाएको छ । आयोगको यस निष्कर्षले निर्वाचनमा धाँधली भएको दाबी गर्दै आएका प्रधानमन्त्री बेन्जामिन नेतान्याहुलाई धक्का पुगेको छ ।
नेतान्याहु र उनका समर्थकहरूले अरब नेतृत्वका दलहरूले विदेशी सहयोगमा निर्वाचनमा धाँधली गरेको र मतदाताको जनमत प्रभावित पारेको आरोप लगाउँदै आएका थिए । तर, उनीहरूले आफ्नो आरोप पुष्टि गर्ने कुनै प्रमाण प्रस्तुत गर्न सकेका छैनन् ।
निर्वाचन आयोगले बुधबार जारी गरेको विज्ञप्तिमा निर्वाचनको निष्पक्षतामा असर पार्ने वा परिणाम प्रभावित गर्ने कुनै अनियमितता फेला नपरेको स्पष्ट पारेको छ ।
निर्वाचन समितिका कार्यवाहक निर्देशक डीन लिभ्नेले प्राप्त सबै उजुरीमाथि छुट्टाछुट्टै र विस्तृत अनुसन्धान गरिएको जानकारी दिँदै निर्वाचन परिणाम अमान्य ठहर गर्ने कुनै आधार नभेटिएको बताए । उनका अनुसार निर्वाचन परिणामले मतदान केन्द्रमा मतदाताले व्यक्त गरेको जनमतलाई सही रूपमा प्रतिबिम्बित गरेको छ ।
निर्वाचन परिणामअनुसार नेतान्याहुको धार्मिक–राष्ट्रवादी गठबन्धनले संसद्मा बहुमत गुमाएको छ भने अरब नेतृत्वका दलहरूले उल्लेख्य सफलता हासिल गरेका छन् ।
निर्वाचनमा विदेशी हस्तक्षेप भएको आरोपबारे इजरायलको गुप्तचर निकाय शिन बेटले छुट्टै अनुसन्धान गरिरहेको निर्वाचन समितिका प्रवक्ताले बताएका छन् । विदेशी पक्षले निर्वाचन प्रभावित पार्न खोजेको आरोप गम्भीर भए पनि त्यसले निर्वाचन परिणाममा असर पारेको प्रमाण नभेटिएको समितिले जनाएको छ ।
निर्वाचन परिणाम बुधबार औपचारिक रूपमा प्रमाणीकरण भएपछि राष्ट्रपति आइज्याक हर्जोगले संसद्मा निर्वाचित दलका प्रतिनिधिसँग सरकार गठनबारे परामर्श गर्नेछन् । दुई दिनसम्म चल्ने परामर्शपछि उनले सरकार गठनका लागि सबैभन्दा उपयुक्त अवस्थामा रहेको नेतान्याहु वा उनका प्रमुख प्रतिद्वन्द्वी तथा विपक्षी नेता गादी आइजेनकोटमध्ये एकलाई जिम्मेवारी दिनेछन् ।
तर, नेतान्याहुको गठबन्धन र आइजेनकोट नेतृत्वको विपक्षी समूह दुवैले सरकार गठनका लागि आवश्यक संसदीय बहुमत जुटाउन सकेका छैनन् । यस्तो अवस्थामा आइजेनकोट र अरब नेतृत्वका केही दलबीच गठबन्धन बन्न सक्ने सम्भावना देखिएको छ । दुवै पक्षले सरकार गठन गर्न नसकेमा इजरायलमा आगामी वर्षको सुरुतिर पुनः निर्वाचन हुन सक्नेछ ।
