बीबीसी । बेलायती प्रधानमन्त्रीको कार्यालय डाउनिङ स्ट्रिटले अमेरिकी उपराष्ट्रपति जेडी भान्सले हेनरी नोवाकको हत्या प्रकरणबारे दिएको टिप्पणीप्रति आपत्ति जनाएको छ । कार्यालयले लोकतन्त्रमा हस्तक्षेप गर्दै समाजमा विभाजन सिर्जना गर्ने प्रयास भएको आरोप लगाएको हो ।
भान्सले सामाजिक सञ्जाल एक्समा पोस्ट गर्दै १८ वर्षीय बेलायती विद्यार्थी हेनरी नोवाकको हत्या ‘आप्रवासीहरूको ठूलो प्रवेश’ का कारण भएको दाबी गरेका थिए । उनले घटनाप्रति ‘धर्मोचित आक्रोश’ आवश्यक रहेको उल्लेख गरेका थिए ।
त्यसपछि डाउनिङ स्ट्रिटका प्रवक्ताले नोवाक परिवारले घटनालाई थप विभाजन फैलाउने माध्यम नबनाउन आग्रह गरेको बताएका छन् । ‘हाम्रो राजनीति यस्ता दुःखद परिस्थितिमा पनि समाजलाई एकताबद्ध गर्ने खालको हुनुपर्छ,’ वक्तव्यमा भनिएको छ ।
गत मंगलबार साउथह्याम्पटनमा सार्वजनिक गरिएको बडीक्याम फुटेजपछि हिंसात्मक प्रदर्शन भएको थियो । भिडियोमा प्रहरीले मरणासन्न अवस्थामा रहेका नोवाकलाई हतकडी लगाएको देखिएको थियो । त्यसअघि अभियुक्त विक्रम डिग्वाले आफू जातीय आक्रमणको शिकार भएको झुटो दाबी गरेका थिए ।
डिग्वालाई न्यूनतम २१ वर्ष कैद सजायसहित आजीवन कारावास सुनाइएको छ । उनले २१ सेन्टिमिटर लामो धारिलो हतियार प्रयोग गरी गत डिसेम्बरमा नोवाकको हत्या गरेका थिए ।
भान्सले नोवाक ‘अधिकारीहरूले परित्याग गरेको अवस्थामा’ मृत्यु भएको टिप्पणी गर्दै युरोपेली नेतृत्वले आप्रवासन नीतिमा कडाइ नगरेको आरोप लगाएका थिए । तर बेलायती अभियोजन निकायले डिग्वा जन्मजात बेलायती नागरिक भएको पुष्टि गरेको छ ।
बालबालिका तथा परिवारमन्त्री जोश म्याकएलिस्टरले पनि भान्सको टिप्पणीको अप्रत्यक्ष आलोचना गर्दै ‘विषाक्त राजनीति बेलायतमा आयात गर्न खोजिएको’ बताएका छन् । उनले बेलायतको प्रहरी व्यवस्थाबारे अमेरिकी राजनीतिज्ञको सल्लाह आवश्यक नरहेको उल्लेख गरे ।
यसैबीच कन्जरभेटिभ पार्टीकी नेता केमी बेडेनोकले घटनाको परिस्थितिबारे स्वतन्त्र छानबिनको माग गरेकी छन् । स्वतन्त्र प्रहरी निगरानी निकायले प्रहरी अधिकारीहरूको व्यवहारबारे अनुसन्धान गरिरहेको छ भने अर्को वर्ष इन्क्वेस्ट सुनुवाइ हुने तय भएको छ ।
यसअघि प्रविधि अर्बपति इलोन मस्कले पनि नोवाक घटनालाई लिएर बेलायती प्रहरी र सञ्चारमाध्यमको आलोचना गरेका थिए । प्रधानमन्त्री कीर स्टार्मरले मस्कमाथि “विभाजन भड्काउने प्रयास” गरेको आरोप लगाएका छन् ।
