काठमाडौं । प्रहरीले काठमाडौँको इन्द्रचोकस्थित एक गहना पसलमा पेस्तोल देखाएर लुटपाट गर्ने गिरोहलाई पक्राउ गरेको छ । जिल्ला प्रहरी परिसर काठमाडौँको टोलीले उनीहरुलाई पक्राउ गरेको हो ।
पक्राउ पर्नेमा भक्तपुरको ठिमी नगरपालिका–९ बोडे बस्ने ३० वर्षीय विकेश राजवाहक, काठमाडौं डल्लु बस्ने ३४ वर्षीय अरुण भुजेल छन् । उनीहरुले वैशाख १७ गते इन्द्रचोकको एक ज्वेलरी पसलमा पेस्तोल ताक्दै लुट्ने प्रयास गरेका थिए । तर पसलमा रहेकी युवतीले प्रतिकार गरेकी थिइन् ।
उनीहरुलाई सोमबार काठमाडौंको विभिन्न स्थानबाट नियन्त्रणमा लिई थप अनुसन्धान भइरहेको जिल्ला प्रहरी परिसरका एसपी पवन भट्टराईले जानकारी दिएका छन् ।
उनीहरुले गत पुसमा पनि मांसान गल्लीस्थित होलसेल पसलमा पेस्तोल देखाई २ तोलाको सुनको सिक्री, नगद ४ लाख, मोबाइल थान २ र सीसीटीभीमा समेत लुटेको अनुसन्धानको क्रममा खुलेको प्रहरीले जनाएको छ ।उनीहरुको साथबाट प्रहरीले चाईनिज पेस्तोल, म्यागजिन, गोली, नक र घटना भएको समयमा प्रयोग भएको कपडाहरु बरामद गरेको छ ।
