सेनाले गिरफ्तार गरेकी म्यानमारकी नेतृ आङ साङ सूकीमाथि दोस्रो अभियोग लगाइएको छ।
अहिले सैनिक नेतृत्वको सरकारले म्यानमारको नेशनल डिजास्टर कानूनको उल्लंघन गरेको अभियोग लगाएको हो । मंगलबार जारी गरिएको नयाँ आरोपबारे केही स्पष्ट भएको छैन ।
यसअघि सत्ता हातमा लिएको सेनाको नेतृत्वले अवैध वाकिटकी राखेको अभियोग लगाएको थियो । त्यसको सुनुवाईका लागि भिडियो लिंक मार्फत प्रस्तुत हुने क्रममा सूकीमाथि दोस्रो आपराधिक आरोप लगाइएको हो ।
गएको नोभेम्बर ८ मा भएको चुनावमा धाँधली भएको आरोप लगाउँदै सेनाले सूकीसहितलाई पक्राउ गरि सत्ता हातमा लिएको हो । तर उसले धाँधलीको प्रमाण भने दिएको छैन । सो चुनावमा सूकीको पार्टीले अत्याधिक बहुमत ल्याएको थियो ।
सेनाले फेब्रुअरी १ मा सेनाले निर्वाचित सत्ता हत्याएर शक्ति आफ्नो हातमा लिएको थियो।
सैनिक कू विरुद्ध प्रदर्शन बढ्दै जाँदा सेनामाथि दबाब बढेको छ। सर्वसाधारण, पेशाकर्मी तथा भिक्षुसहितले सेनाविरुद्ध प्रदर्शन गर्दै आएका छन् ।
