एजेन्सी । स्पेनिस विङ्गर मार्को एसेन्सियोको गोलमा रियल म्याड्रिडले ला लिगामा महत्त्वपूर्ण जीत निकालेको छ । आइतबार राति भएको खेलमा रियल म्याड्रिडले ग्रानाडालाई १-० गोलले पराजित गरेको हो ।
घरेलु मैदान सान्टियागो बेर्नाबेउमा भएको खेलमा रियल म्याड्रिडलाई जीत दिलाउन मार्को एसेन्सियोले निर्णायक गोल गरे । पहिलो हाफ गोलरहित बराबरीमा सकिएको खेलको ७४ औं मिनेटमा एसेन्सियोले डि-बक्स बाहिरबाट उत्कृष्ट गोल गर्दै म्याड्रिडलाई खेलमा अगाडि बढाएका थिए ।
बाँकी समयमा दुवै टोलीबाट थप गोल हुन नसक्दा रियल म्याड्रिड १-० गोलले विजयी भयो । जीतसँगै म्याड्रिड २३ खेलबाट ५३ अङ्क जोड्दै लिगको शिर्ष स्थानमा रहेको छ । पराजित ग्रानाडा समान खेलबाट २४ अङ्कको साथ १६ औं स्थानमा छ ।
