काठमाडौँ । शिक्षाविद् तथा काठमाडौँ विश्वविद्यालयका संस्थापक उपकुलपति प्रा डा सुरेशराज शर्माको बुुधबार ८६ वर्षको उमेरमा निधन भएको छ ।
शिक्षाविद् डा शर्माको उपचारका क्रममा आज काठमाडौँको धुम्बाराहीस्थित ह्याम्स अस्पतालमा निधन भएको हो । उनको बिहीबार अन्त्येष्टि गरिने पारिवारले जनाएको छ ।
सिन्धुलीमा १९९७ साउनमा जन्मिएका डा शर्माले रसायनशास्त्रमा विद्यावारिधि गरेका थिए । उनी नेपालको उच्च शिक्षा क्षेत्रको विकासमा महत्वपूर्ण योगदान पुर्याउने शिक्षाविद्का रूपमा परिचित छन् । सामुदायिक क्षेत्रबाट विश्वविद्यालय सञ्चालन र उच्च शिक्षाको विस्तारमा शर्माको महत्वपूर्ण भूमिका रहेको थियो ।
विशेषगरी उच्च शिक्षालाई प्राविधिक तथा व्यावसायिक धारसँग जोड्दै गुणस्तरीय शिक्षा प्रदान गर्ने उद्देश्यका साथ शिक्षाविद् डा शर्माले विभिन्न शिक्षालयमा रहेर काम गरेका थिए ।
काठमाडौँ विश्वविद्यालय स्थापनापछि संस्थापक उपकुलपतिका रूपमा शिक्षाविद् डा शर्माले विश्वविद्यालयको शैक्षिक तथा संस्थागत आधार निर्माणमा नेतृत्वदायी भूमिका निर्वाह गरेका थिए । उनको नेतृत्वमा विश्वविद्यालयले प्राविधिक तथा व्यावसायिक शिक्षालाई प्राथमिकता दिँदै उच्च शिक्षामा नयाँ अभ्यासको सुरु गरेको थियो ।
