काठमाडौं । अख्तियार दुरुपयोग अनुसन्धान आयोगले सर्लाहीको बागमती नगरपालिकास्थित भरत ताल निर्माणमा अनियमितता भएको भन्दै मधेश प्रदेशका पूर्वमन्त्रीसहित ७ जनाविरुद्ध भ्रष्टाचार मुद्दा दायर गरेको छ ।
आयोगले बिहीबार विशेष अदालतमा मुद्दा दायर गरेको हो । आयोगले मधेशका तत्कालीन अर्थमन्त्री शैलेन्द्रप्रसाद साह तत्कालीन सचिव गजेन्द्रकुमार ठाकुर, बागमतीका मेयर भरत कुमार थापा, तत्कालीन उपमेयर लीलाकुमारी मोक्तान, प्रशासकीय अधिकृत विमलकुमार पोखरेल उपसचिव उद्धवराज न्यौपाने र विकुई–धुलिखेल जेभीका प्रतिनिधि युवराज पोखरेलविरुद्ध मुद्दा दायर गरेको हो ।
अख्तियारका अनुसार बागमती नगरपालिकाले भरत ताल निर्माणको दोस्रो चरणको ठेक्का प्रक्रियामा अनियमितता भएको छ ।
पहिलो चरणको निर्माण कार्य नसकिँदै र पुरानै डीपीआरले काम चल्ने अवस्था हुँदाहुँदै, बदनीयतपूर्वक थप आर्थिक दायित्व सिर्जना गर्न नयाँ डीपीआर तयार पारिएको, जटिल सर्तहरू चाहेको व्यक्तिलाई ठेक्का दिने गरी अन्य प्रतिस्पर्धीलाई वञ्चित गरिएको अख्तियारले जनाएको छ । अख्तियारले उक्त निर्माणमा ३९ करोड ३९ लाख रुपैयाँ भ्रष्टाचार भएको दाबी गरे पनि आरोपितहरूमाथि फरक–फरक बिगो र जरिवाना मागदाबी गरेको छ ।
