काठमाडौँ । सभापति कप पुरुष फुटबल प्रतियोगितामा मच्छिन्द्र क्लबले एपिएफ क्लबलाई पराजित गर्दै सेमिफाइनलमा प्रवेश गरेको छ ।
त्रिपुरेश्वरस्थित दशरथ रङ्गशालामा शुक्रबार भएको खेलमा मच्छिन्द्रले विभागीय टोली एपिएफ क्लबलाई १–० गोलअन्तरले पराजित गर्दै प्रतियोगिताको सेमिफाइनलमा प्रवेश गरेको हो ।
मच्छिन्द्रको जितमा सनिश श्रेष्ठले गोल गरे । सनिशले खेलको दोस्रो हाफको अतिरिक्त समयमा गरेको एक गोल मच्छिन्द्रका लागि निर्णयक सावित भयो । योसँगै सेमिफाइनल खेलमा मच्छिन्द्रले सङ्कटा फुटबल क्लबसँग खेल्नेछ । बिहीबार भएको पहिलो क्वार्टरफाइनलमा ‘ए’ डिभिजन लिग च्याम्पियन चर्च ब्वाइजलाई ३–० ले हराउँदै सङ्कटाले सेमिफाइनलको यात्रा तय गरेको थियो ।
नेपाली कांग्रेसको भ्रातृ संस्था नेपाल लोकतान्त्रिक खेलकुद सङ्घ महाधिवेशन निर्देशन समितिको आयोजनामा भएको प्रतियोगिताको उपाधि विजेताले २६ लाख र उपविजेताले १३ लाख पाउनेछन् ।
