काठमाडौं । वामदेव गौतमले प्रधानमन्त्री केपी शर्मा ओलीलाई प्रधानमन्त्री र पार्टी अध्यक्षबाट राजीनामा दिन आग्रह गरेका छन् ।
शुक्रबार काठमाडौंमा आयोजित एक कार्यक्रममा प्रधानमन्त्री ओलीले आफूलाई फोन गरेर वामदेवले राजीनामा दिन आग्रह गरेको जानकारी दिए ।
प्रधानमन्त्रीकाअनुसार संवादका क्रममा वामदेवले मदन भण्डारी कांग्रेसले मारेर र त्यो कुरा आफूलाई त्यतिबेलै थाहा भएको बताएका थिए । वामदेवले आफूलाई आफ्ना स्वकीय सचिव राजेश बज्राचार्य सम्झिएर त्यो कुरा बताएका थिए । तर वामदेवले प्रधानमन्त्रीसँग कुरा गरिरहेका थिए ।
प्रधानमन्त्रीले वामदेवका कुरा सुनाउँदै भने,‘अहिले भर्खर म गाडीमा आउँदै थिएँ । वामदेवजीले फोन गर्नुभयो । मदन भण्डारी कांग्रेसले मारेको हो । मलाई पहिला नै थाहा थियो । तर म चुप लागेँ । अब म बुढो पनि भइसकें जेसुकै भएपनि मलाई केही छैन, त्यसकारण म कुरा भन्दैछु । मेरै स्वरमा छ । अब केपी ओलीले प्रधानमन्त्रीबाट पनि राजीनामा गर्नुपर्छ, पार्टी अध्यक्षबाट पनि गर्नुपर्छ, यस्तो भनेर बस्न पाइन्छ ? भन्देऊ तिम्रो ठूलो बालाई भनेर कुरा मसँग गर्दै हुनुहुन्थ्यो तर राजेश भनेर । तर वामदेवजीको फोन आएको देखेपछि राजेशबाट फोन लिएर मैले उठाएँ । कमरेड के छ हालखबर भनेँ ठिक छ भन्नुभयो । कुरा गर्दै गइयो तर अन्तिममा त तिम्रा ठूला बालाई भन्देऊ । प्रधानमन्त्री र अध्यक्षबाट पनि राजीनामा गर्नु भन्देऊ भनेर एकछिन पड्किनुभयो । हस् म भन्दिउँला भनेँ राखिदिए।’
प्रधानमन्त्री ओलीले गौतमलाई समेत भ्रम पर्नेगरी आवाज बनाएर युट्यबमा राखिएको बताए । उनले भने, ‘एआइको जमाना छ बनाए होला कसैले ।’
