काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आफूहरू उद्देश्यमा अडिग रहेको बताएका छन् । पार्टी दोस्रो स्थापना दिवसमा अवसरमा शुभकामना सन्देश दिँदै सभापति लामिछानेले कैयौँ कठिनाइ चिर्दै आफूहरू अघि बढेको बताएका हुन् ।
उनले शुभचिन्तकहरूको आशा र अपेक्षासहितका अग्लाअग्ला पहाडहरू काँधमा बोकेर अहिले भीरको बाटोमा सिस्नु समाउँदै हिँडिरहेको उल्लेख गरेका छन् ।
उनले भनेका छन्, ‘रास्वपा जन्मिएको २ वर्ष भयो । हामी हाम्रो उद्देश्यमा अडिग छौं, गन्तव्यमा स्पष्ट छौं । कुरा बाटोको हो । बाटोमा त कहिले पहिरो जान्छ, कहिले ढुंगाा खस्छ । आमनागरिक एवं रास्वपा परिवारका तमाम सदस्य शुभचिन्तकहरुको आशा र अपेक्षासहितका अग्ला अग्ला पहाडहरु काँधमा बोकेर हामी अहिले भिरको बाटोमा सिस्नु समाउँदै हिँडिरहेका छौं । कयौं कठिनाइहरुलाई नचिरी एउटा पार्टी स्थापित हुन सक्दैन । वैचारिक स्पष्टतासँगै राजनीतिक परिपक्वता हाँसिल गर्दै हामी यो यात्रा सम्पन्न गर्छौ। विश्वास गर्ने एक दुई जना मात्र हुदा त हिँड्ने आँट गरियो भने आज त हामीसँग लाखौं लाख शुभेच्छुकहरु हुनुहुन्छ । २ वर्ष अघि हामीलाई विश्लेषण गर्न त परको कुरा, अस्तित्वमा समेत नरहने ठोकुवा गर्ने कयौं विश्लेषकहरु आज ‘रास्वपा खस्कदो छ’ भन्ने विश्लेषणवाला आर्टिकलको ड्राफ्ट लेख्दै होलान्, कोही टक शो मा बोल्न घाँटी र टाइ मिलाउँदै होलान्। तर हामी हाम्रो यात्रामा अविचलित छौं ।’
उनले २१ सांसदले एक वर्षमा सिङ्गो सदनको ध्यान तानेको र ४ मन्त्रीले सिङ्गो देशको ध्यान तानेको दाबी गरेका छन् ।
उनले भनेका छन्, ‘सम्झ्नुस् त, देश तथा विदेशका टोलटोल वस्ती वस्तीका आम मान्छेको आवाज बोल्दा बोल्दै त्यो आवजलाई ‘घण्टी’मा रुपान्तरण गरेर २ वर्षमा हामी हल्ला नै नगरी सिंहदरबार पसिसक्यौं । २१ सांसदले एक वर्षमा सिङ्गो सदनको ध्यान तान्यौं, ४ मन्त्रीले सिङ्गो देशको ध्यान तान्दैछौं । साथीहरू घण्टी सिंहदरबार पस्यो, यो देशको मतपत्रमा सदाका लागि घण्टी चुनाव चिन्ह बस्यो । बाँकी काम हामी गर्छौ, तपाईंहरु न चिन्ता लिनुस्, न पिर गर्नुस् । सबैलाई दोस्रो स्थापना दिवसको शुभकामना ।’
