काठमाडौं । झुटा विवरण पेश गरी अंगीकृत नागरिकता लिन खोज्ने तीन जनालाई प्रहरीले पक्राउ गरेको छ । जिल्ला प्रहरी परिसर काठमाडौंको टोलीले झुटा विवरण पेश गरी नागरिकता लिन खोज्ने भारतीय नागरिकहरु हरियोम गुप्ता भन्ने हरिओम कुमार, वर्ष २० को ऋषि गुप्ता र वर्ष १८ का हर्ष गुप्तालाई पक्राउ गरेको हो ।
मंगलबार हर्ष गुप्ता र ऋषि गुप्ताद्वयले आफूसँगै रही व्यापार व्यवसाय गरी बसेका आफ्ना बुबालाई बेपत्ता भएको बनाई भारतीय नागरिक भएको तथ्यलाई समेत लुकाई छिपाई वंशजको नाताले नागरिकता लिन जिल्ला प्रशासन कार्यालय काठमाडौंमा विवरण पेश गरेका थिए ।
शंका लागि प्रशासनले अनुसन्धान गर्न प्रहरीलाई पत्र पठाएपछि उनीहरु पक्राउ परेका परिसरले जनाएको छ । उनीहरुविरुद्ध नागरिकता ऐन अन्तर्गतको कसुर मुद्दामा काठमाडौं जिल्ला अदालतबाट पाँच दिनको म्याद गरी अनुसन्धान भइरहेको प्रहरीले जनाएको छ ।
