काठमाडौं । नेकपा एमालेका अध्यक्ष केपी शर्मा ओलीले गिरीबन्धु टी–स्टेटमा भएको भनिएको अनियमितताकाबारेमा काठमाडौंका मेयर बालेन साहलाई सोध्न आग्रह गरेका छन् ।
सोमबार संसद भवन परिसरमा पत्रहरुको प्रश्नमा संक्षिप्त जवाफ दिँदै यसबारेमा बालेन सोध्न आग्रह गरेका छन् । पत्रकारहरुको प्रश्नको आक्रोशितरुपमा जवाफ दिँदै ओलीले भने, ‘बालेनलाई सोध्नु ।’
मेयर साहले सोमबार सामाजिक संजालमार्फ एमाले अध्यक्ष ओलीलाई गिरीबन्धु टिस्टेटको १० हजार करोडको काण्ड लुकाउन र जनता झुक्काउनु लागेको आरोप लगाएका थिए ।
मेयर साहले भनेका छन्, ‘१० हजार करोडको काण्ड लुकाउन अर्को काण्ड गरेर जनता नझुक्याउनु होला माननीय केपी ओलीज्यू । झापा गिरिबन्धुमा बैना लिनेहरूलाई ‘दुई वर्षभित्र गिरिबन्धुकै जग्गा दिलाउँछौं’ भनेर थम्थमाउनु भएछ । गिरिबन्धु चिया बगानको जग्गामा गर्न खोजेको नीतिगत घोटलामा तपाईंको सहभागिताको इतिहास हेर्दा त्यहाँ तपाईंलाई नभनी पात पनि हल्लन्छ भन्ने लाग्दैन ।’
उनले उनले ओलीलाई गिरिबन्धुका पीडितको बैन फिर्ता गर्न पनि आग्रह गरेका छन् । उनले भनेका छन्, ‘यही १० हजार करोडको काण्ड लुकाउन र जनतालाई भुलाउन राज्यको सम्पूर्ण शक्ति लगाएर न्युरोडमा हामीले बनाउन लागेको फूटपाथ फेरि सडक बनाउनु थाल्नु भएछ । अब बल्ल देश बन्ने भएछ । आफ्ना कर्तुत लुकाउन र विषयान्तर गरे पनि काम हुनु राम्रो हो । तपाईंको शक्तिले अब रिङरोड बनाउनु, बुटवल चितवन बाटो बनाउनु, यस्ता धेरै आयोजनामा लगाउनुहोला । हामी साथमा छौँ । अनि समयमै गिरिबन्धुमा पीडितको बैना फिर्ता गर्नुहोला । नत्र कोही साँच्चैको नयाँ आउला र फाइल पल्टाउला । हुन त, पहिले पनि जेल बस्नु भएको हो । धन्यवाद ।’
