काठमाडौं । पोखरा थन्डर्स नेपाल सुपर लिग(एनएसएल)को प्लेअफमा पुगेको छ । मंगलबार भएको खेलमा बुटवल लुम्बिनी एफसीलाई १-० गोलले हराउँदै पोखरा प्लेअफमा पुग्ने पहिलो टोली बनेको हो ।
त्रिपुरेश्वरस्थित दशरथ रंगशालामा भएको खेलमा पोखरालाई जित दिलाउन मोसेसले निर्णायक गोल गरे । बराबरीतर्फ लम्किएको खेलको दोस्रो हाफको इन्जुरी समयमा मोसेसले गोल गर्दै पोखरालाई जित दिलाएका हुन् ।
जितसँगै पोखरा ७ खेलबाट १४ अंक जोड्दै लिगको शीर्ष स्थानमा उक्लिएको छ । समान खेलबाट बुटवलले ७ अंक जोडेको छ । अब पोखराले लिगको अन्तिम खेलमा धनगढीसँग खेल्नेछ ।
