मुगु । मुगुको छायाँनाथ रारा नगरपालिका–६ मुन्दुगाउँमा भएको सामूहिक हत्या प्रकरणका पीडित परिवारले घटनामा संलग्न व्यक्तिलाई पक्राउ गर्न नसकेको भन्दै मृतकको पोस्टमार्टम भएको चार दिनबितिसक्दा पनि शव बुझ्न मानेका छैनन् ।
मुन्दुगाउँमा सामूहिक हत्या भएको एक हप्ता भयो । प्रहरीले हालसम्म घटनामा संलग्नलाई प्रक्राउ गर्न सकेकोे छैन । मृतकहरुको शवलाई पोस्टमार्टमका लागि कात्तिक ११ गते जिल्ला अस्पतालमा मृतकका आफन्त र प्रहरीले जिल्ला अस्पतालमा ल्याएका थिए ।
अस्पतालमा कात्तिक १२ र १३ गते पोस्टमार्टम भएको हो । मृतकहरुको पोस्टमार्टम भए पनि हालसम्म प्रहरीले घटनामा संलग्न व्यक्तिलाई पक्राउ गरी कानुनी प्रक्रियामा ल्याउन नसकेको भन्दै पोस्टमार्टम भएको चार दिनपुग्दा समेत पीडितले शव बुझ्न नमानेका हुन् ।
कात्तिक ८ गते २८ वर्षीया श्रीदेवी बोहोरा, सात महिने छोरा रहर, ८ वर्षीया छोरी अप्सरा बोहोरा र ११ वर्षीय छोरा मनोजको धारिलो हतियार प्रयोग गरी हत्या भएको थियो ।
हत्यामा संलग्नलाई पक्राउ गरी कारबाहीको दायरामा ल्याउने आश्वासन दिए पनि हालसम्म कसैलाई पक्राउ नगरिएको भन्दै पीडितन परिवारले असन्तुष्टि जनाएका छन् ।
घटनामा संलग्नलाई प्रक्राउ गरी कानुनी प्रक्रियामा नल्याउँदासम्म शव नबुझ्ने पीडितहरुको अडान रहेको छायाँनाथ रारा नगरपालिका–६ का वडाध्यक्ष मृतक श्रीदेबीका काका खेम रावलले बताए ।
कर्णाली प्रदेश प्रहरी प्रमुख भीमप्रसाद ढकाललगायत घटनास्थल पुगेर घटनाबारे बुझेका थिए । जिल्ला प्रहरी कार्यालयका प्रहरी नायब उपरीक्षक वीरेन्द्र थापाले घटनाबारे सबै प्रक्रिया अपनाएर अनुसन्धान भइरहेको बताए ।
शवको पोस्टमार्टम भए पनि पोस्टमार्टम घरमा लामो समयसम्म राख्ने फ्रिजलगायत अन्य उपकरण नहुँदा शव गन्हाउन थालेको बताउँदै यसले अस्पताल क्षेत्रमा दुर्गन्ध फैलन थालेको जिल्ला अस्पतालका डाक्टर अर्जुन भामले बताए ।
