काठमाडौं । नेकपा एमालेले राष्ट्रियसभा बैठकमा आज पनि अवरोध गरेको छ । आइतबार बैठकको सुरुमै एमाले सांसद भगवती न्यौपानेले प्रधानमन्त्री पुष्पकमल दाहाल प्रचण्डले राजीनामा नदिएसम्म बैठकको कारबाही अघि बढाउन नदिने बताइन् ।
उनले प्रचण्डलाई प्रधानमन्त्रीको कुर्सीमा बस्ने नैतिक आधार नभएको भन्दै प्रधानमन्त्रीबाट प्रचण्डको बहिर्गमन नभएसम्म सदनमा आफ्नो दलको अवरोध कायमै रहने बताइन् ।
राष्ट्रियसभा अध्यक्ष गणेश तिमिल्सिनाले बैठकलाई अगाडि बढाउन सहयोग गर्न एमालेका सांसदहरूलाई आग्रह गरेका थिए । तर, एमालेका सांसदहरूले भने बैठकमा उठेर विरोध जनाइरहे । एमालेले बुधबार यता लगातार राष्ट्रियसभा र प्रतिनिधिसभाको बैठकमा अवरोध गर्दै आएको छ ।
