एजेन्सी । फरवार्ड करिम बेन्जिमाले ह्याट्रिक पूरा गरेपछि स्पेनिस लिग ला लिगामा रियल म्याड्रिडले फराकिलो जीत निकालेको छ । आइतबार राति भएको खेलमा रियल भाल्लाडोलिडलाई ६-० गोलले हराउँदै म्याड्रिडले शीर्ष स्थानमा रहेको बार्सिलोनासँग अंक दुरी १२ अंकमा झारेको हो ।
घरेलु मैदान सान्टियागो बेर्नाबेउमा भएको खेलमा म्याड्रिडलाई जीत दिलाउन बेन्जिमाले ह्याट्रिक पूरा गर्दा रोद्रिगो, मार्को एसेन्सियो र लुकास भास्क्वेजले समान एक-एक गोल गरे ।
खेलको २२ औं मिनेटमै एसेन्सियोको पासमा रोद्रिगोले गोल गर्दै म्याड्रिडलाई शुरुवाती अग्रता दिलाएका थिए । २९ औं मिनेटमा भिनिसियसको क्रसमा बेन्जिमाले गोल गर्दै म्याड्रिडको अग्रता दोब्बर बनाए । ३२ औं मिनेटमा भिनिसियसकै पासमा बेन्जिमाले व्यक्तिगत दोस्रो गोल गर्दै म्याड्रिडलाई फराकिलो जीततर्फ अगाडि बढाएका थिए ।
३६ औं मिनेटमा रोद्रिगोको क्रसमा बेन्जिमाले बाइसाइकल किकमा व्यक्तिगत तेस्रो गोल गर्दै ह्याट्रिक पूरा गरेर म्याड्रिडलाई पहिलो हाफमा ४-० गोलको अग्रता दिलाएका थिए । ७३ औं मिनेटमा रोद्रिगोको पासमा एसेन्सियोले गोल गर्दै म्याड्रिडको अग्रता बढाए । यस्तै इन्जुरी समयमा हजार्डको पासमा भास्क्वेजले गोल गर्दै म्याड्रिडलाई ६-० गोलको फराकिलो जीत दिलाएका हुन् ।
जीतसँगै म्याड्रिड २७ खेलबाट ५९ अंक जोड्दै लिगको दोस्रो स्थानमा यथावत छ । समान खेलबाट २८ अंक जोडेको भाल्लाडोलिड १६ औं स्थानमा रहेको छ ।
