युक्रेनका राष्ट्रपति भोलोदिमिर जेलेन्स्कीले पूर्वी क्षेत्रमा भइरहेको लडाइँको अग्रभागमा रहेको बख्मुत सहरको अवस्था झन् कठिन बन्दै गइरहेको बताएका छन् ।
रुसी सेनाले छ महिनाभन्दा लामो समयदेखि उक्त सहर कब्जा गर्ने प्रयास गरिरहेको छ । हालसम्म रहेका स्थानहरू जोगाउन प्रयोग गर्न सकिने सबै कुरा दुस्मनले लगातार ध्वस्त पारिरहेका उनले बताएका छन् ।
अमेरिकी अर्थमन्त्री जेनेट यलनले सोमबार किएभ भ्रमणको क्रममा रुसलाई हतियार सहयोग नगर्न चीनलाई चेतावनी दिएपछि जेलेन्स्कीले आफ्नो स्थितिबारे जानकारी दिएका हुन् ।
रुसले एक वर्षअघि युक्रेनमा आक्रमण गरे यताका केही विध्वंसकारी लडाइँ दोनेत्स्क क्षेत्रको बख्मुतमा भएको छ । उक्त सहरको केही भूभाग रुस र उसका पृथकतावादी सहयोगीहरूको नियन्त्रणमा छ ।
हालसालै रुसी सेनाले त्यस औद्योगिक सहरलाई कब्जा गर्ने प्रयास तीव्र बनाएको छ र उसका सेना युद्ध मैदानमा निकै अगाडि बढिरहेका छन् । स्वघोषित दोनेत्स्क पिपल्स रिपब्लिकका पृथकतावादी नेता डेनिस पुश्लिनले सहर प्रवेश गर्ने सबै सडकहरू व्यावहारिक रूपमा हमला हुन सक्नेगरि नियन्त्रणमा रहेको बताए ।
नियमित सम्बोधनमा त्यहाँको परिस्थितिबारे बोल्दै राष्ट्रपति जेलेन्स्कीले, रुसको नयाँ आक्रमण नीतिका कारण बख्मुतसम्म पुग्ने व्यवस्था र त्यस भूभागको रक्षा सुनिश्चित गर्न कठिन भइरहेको जनाएका छन् ।
सोमबार किएभको आकस्मिक भ्रमणका क्रममा जेनेट यलनले युक्रेनलाई १.२५ अर्ब डलरको आर्थिक तथा बजेट सहायता घोषणा गरिन् ।
