नवलपरासी । नवलपरासी (बर्दघाट–सुस्तापूर्व)को कावासोती–१७ स्थित सरस्वती माविको खेलमैदानमा सञ्चालित राष्ट्रियस्तरको भेट्रान्स फुटबल प्रतियोगिताको उपाधि चितवन भेट्रान्सले जितेको छ । शनिबार सम्पन्न फाइनलमा चितवन भेट्रान्सले हेटौँडाको कालभैरव भेट्रान्सलाई ३–१ गोलअन्तरले पाखा लगाउँदै उपाधि आफ्नो पोल्टामा पारेको हो ।
उपाधि विजेता चितवनको तर्फबाट कप्तान वीरेन्द्र पाण्डेले दुई तथा सुरज गुरुङले एक गोल गरे । चितवनका पाण्डेले प्रतियोगिताको २२औँ मिनेट र थप गरिएको अतिरिक्त चार मिनेटमा गोल गरे भने गुरुङले प्रतियोगिताको ११औँ मिनेटमा एक गोल गरेका हुन् । कालभैरव हेटौँडाको तर्फबाट डेविन श्रेष्ठले थप गरिएको अतिरिक्त तेस्रो मिनेटमा एक गोल गरेपनि टोलीको हार टार्न पर्याप्त रहेन ।
चितवन भेट्रान्सले उपाधिसँगै रु एक लाखसहित ट्रफी, मेडल र प्रमाणपत्र प्राप्त गरेको छ । प्रतियोगिताको उपविजेतामा चित्त बुझाएको कालभैरव भेट्रान्स क्लब हेटौँडाले रु ५० हजारसहित ट्रफी, मेडल र प्रमाणपत्रमा चित्त बुझाउन बाध्य भएको छ । फाइनल खेलमा चितवन भेट्रान्सका सुरज गुरुङ म्यान अफ म्याच घोषित भए । त्यस्तै प्रतियोगिताभरको सर्वाधिक गोलकर्ता चितवन भेट्रान्सका कप्तान वीरेन्द्र पाण्डे बने । पाण्डेले प्रतियोगिताभरि चार गोल गरेका थिए ।
त्यसैगरी उत्कृष्ट गोलरक्षक चितवन भेट्रान्सका गोलरक्षक राजकुमार गुरुङ, उत्कृष्ट डिफेन्डर कालभैरव हेटौँडाका हेमकुमार शर्मा, उत्कृष्ट मिडफिल्डर कालभैरव हेटौँडाकै दीपककुमार राई तथा सर्वोत्कृष्ट खेलाडी चितवन भेट्रान्सका हर्कबहादुर गुरुङ घोषित भए । उत्कृष्ट खेलाडीले रु पाँच हजारसहित ट्रफी, मेडल र प्रमाणपत्र प्राप्त गरे ।