काठमाडौँ । सरकारले अश्रुग्यास खरिद गर्न नदिँदा नेपाल प्रहरी १० वर्षअघिको म्याद गुज्रिएको प्रयोग गर्न बाध्य भएको छ । प्रहरीले रूपन्देहीको मोतीपुरमा प्रस्तावित औद्योगिक क्षेत्रको जग्गा अनधिकृत कब्जा गर्नेविरुद्ध १० वर्षअघि म्याद गुज्रेको अश्रुग्यास प्रयोग गर्न बाध्य भएको थियो ।
‘हामीसँग अश्रुग्यास म्याद गुज्रेको मात्रै छ सरकारले खरिद गर्ने अनुमति नदिँदा बाध्य भएर १० वर्ष अघिकै अश्रुग्यास प्रयोग गरिएको हो,’ नेपाल प्रहरीका एक उच्च अधिकारीले भने । उनका अनुसार नेपाल प्रहरीसँग म्याद गुज्रेको अश्रुग्यास मात्रै छ । त्यसबाहेक अन्य सामग्री पनि प्रयाप्त छैन ।
रूपन्देहीको मोतिपुरमा प्रहरीमाथि आक्रमण भएपछि भीड नियन्त्रणका लागि बाध्य भएर प्रहरीले प्रयोग गरेको अश्रुग्यास १० वर्ष अघि नै म्याद गुज्रेको थियो । त्यहाँ प्रयोग गरिएको अश्रुग्यास सन् २०१० मा म्याद सकिएको थियो । म्याद सकिएको अश्रुग्यास एक प्रकारको विष सरह मानिन्छ । त्यसको असरले मानिसको मृत्यु समेत हुनसक्छ ।
अश्रुग्यास जतिवेला म्याद सकिन्छ त्यतिबेला नै नष्ट गर्नुपर्ने हुन्छ तर अहिलेसम्म नष्ट नगरी राख्नुमा नेपाल प्रहरीको बाध्यता भएको प्रहरी स्रोतको दाबी छ । ‘हामीसँग अन्य कुनै विकल्प छैन भिड नियन्त्रणका गर्नका लागि यही अश्रुग्यास प्रयोग गर्नुपर्ने हुन्छ, हरेक यूनिटमा अहिले म्याद गुज्रेको अश्रुग्यास छ,’ प्रहरी प्रधानकार्यालय स्रोतले भन्यो ।
प्रहरी स्रोतका अनुसार हरेक वर्ष सामान्य मात्रामा अश्रुग्यास किन्ने अनुमति भएपनि त्यो काठमाडौंकै भीडभाड नियन्त्रणमा सकिने भएकाले काठमाडौं बाहिर म्याद गुज्रेकै अश्रुग्यास प्रयोग गर्न थालिएको हो । सामान्यतया अश्रुग्यास प्रयोगबारे भीडमा धेरैको ध्यान नजाने भएकाले पनि प्रहरीले यस्तो कमजोरी पटक पटक दोहोर्याउन थालेको छ।
नेपाल प्रहरीका एक अधिकृतका अनुसार अश्रुग्यासको आयू सामान्यतया ५ वर्षको हुनेछ । २०७४ सालमा खरिद गरेको अश्रुग्यास बाँकी रहेको भएपनि म्याद सकिने बेला भैसकेको छ । तर त्यतिबेला खरिद गरेको सबै अश्रुग्यास निर्वाचनको समयमा सकिएको थियो ।
त्यसपछि अन्तर्राष्ट्रिय सम्मेलन र विशिष्ट व्यक्तिको भ्रमणको बेला पनि प्रहरीले अश्रुग्यास खरिद गरेको भए पनि त्यो अश्रुग्यास यसअघि नै प्रयोग भइसकेको नेपाल प्रहरी स्रोतले जनाएको छ।
नेपाल प्रहरीले प्रत्येक वर्ष अश्रुग्यास खरिद गर्नुपर्ने हुन्छ, तर भीड नियन्त्रणकै लागि भनेर २०७४ पछि खरिद गरेको छैन । विदेशी विशिष्ट पाहुना आएका बखत र केही अन्तर्राष्ट्रिय सम्मेलन भएका बेला सामान्य मात्रमा खरिद गरेको थियो ।
भिड नियन्त्रणका लागि सबैभन्दा राम्रो र उपयोगी माध्यम अश्रुग्यास प्रयोग नै हो । तर चार वर्ष यता प्रहरीले भीडभाड नियन्त्रणकै लागि भनेर अश्रुग्यास खरिद गरेको छैन। ‘अश्रुग्यास लगायतका विविध सामाग्रीहरू खरिद गर्न धेरै पटक भनेका छौ तर गृहमन्त्रालयले यो विषयमा चासो दिँदैन, प्रहरी महानिरीक्षकहरू पनि आफू विवादमा पर्ने भएकाले खरिदको काममा हात हाल्न नपाए हुन्थ्यो भन्दै तर्कन खोज्छन यसको कारणले म्याद गुज्रेको अश्रुग्यास प्रयोग गर्नुपरेको हो’, प्रहरी प्रधानकार्यालय स्रोतले भनेको समाचार नागरिक दैनिकमा टपेन्द्र कार्कीले लेखेका छन् ।
