काठमाडौँ । चीनको सिछुवान प्रान्तीय जनसरकारले अनुदानको रुपमा दिएको अत्यावश्यक स्वास्थ्य सामग्री आज काठमाडौँ आइपुगेको छ । नेपालका लागि चिनियाँ राजदूत हौ यान छिले सामाजिक सञ्जाल ट्विटरमार्फत् उक्त जानकारी दिएकी हुन् ।
चीनको केन्द्रीय सरकारले दिएकाे अनुदानका स्वास्थ्य सामग्री लिन नेपाल सरकारले आफ्नै खर्चमा नेपाल वायुसेवा निगमको वाइडवडी जहाज बेइजिग पठाइरहेको छ । तर सिछुवान प्रान्तले भने आफ्नै खर्चमा स्वास्थ्य सामग्री काठमाडौँ पुर्याइदिएको हो ।
सिछुवान जनसरकारले ३.०६ मिलियन चिनियाँ युवान (५ कराेड ५८ लाख रूपियाँ) बराबरका झण्डै ४ टन मास्क, ४ टन पीपीइ, थर्माेमिटरलगायतका स्वास्थ्य सामग्री पठाएकाे बताइएकाे छ ।
चीनका स्टेट काउन्सिलर तथा विदेशमन्त्री वाङ यीले केही समयअघि नेपाल, अफगानिस्तान, पाकिस्तान, बंगलादेश र श्रीलंकाका विदेशमन्त्रीसँगकाे भर्चुअल बैठकमा नेपाललाई काेराेना महामारीविरूद्ध लड्न चीनका केन्द्रीय तथा स्थानीय सरकार एवम् विभिन्न संस्थाले अत्यावश्यक स्वास्थ्य सामग्री सहयाेग गर्ने जानकारी दिएका थिए । साेही प्रतिवद्धताअनुसार सिछुवान जनसरकारले उक्त सामग्री उपलब्ध गराएकाे हाे ।
सिछुवान र लुम्बिनी प्रदेशबीच भगिनी प्रान्तकाे सम्बन्ध छ । त्यसैगरी सिछुवान प्रान्तकाे सदरमुकाम छन्तु नगरपालिकासँग काठमाडाैँ महानगरपालिका तथा यिपिङ नगरपालिका र कान्च प्रिफ्रेक्चरकाे पाेखरा महानगरपालिकासँग भगिनी सम्बन्ध स्थापित छ ।
छन्तुमा स्थापना हुन लागेकाे नेपाली महावाणिज्यदूतावासकाे उद्घाटनकाे तयारी अन्तिम अवस्थामा पुगेकाे छ ।
China’s good work (Humanistic Work) for the Nepalese People. Good neighbor is that who helps in necessity, misery, and hard time.