काठमाडौँ । सरकारले सार्वजनिक यातायात सञ्चालन गर्ने निर्णय गरेको चिठी सरकारी स्वामित्वकै साझा यातायता पुग्न झण्डै एक हप्ताको समय लागेको छ । बढीमा चार किलोमिटर टाढा रहेको र हिँडेरै एक घण्टामा पुगिने विभागबाट पत्र पाएसँगै साझा यातायातले भोलि बिहीबारबाट सेवा सुरु गर्ने साझा यातायातले जनाएको छ ।
मन्त्रिपरिषद्को बैठक अगिल्लो हप्ताको बैठकले छोटो दुरीमा यातायता सञ्चालन गर्ने निर्णय गरेकाे थियाे । सरकारकाे निर्णय सार्वजनिक भएपछि साझाले बसको मर्मतलगायतका तयारीका काम गरिरहेको थियो । साझा यातायातका प्रबन्धक महेन्द्र पाण्डेले भने, यातायात व्यवस्था विभागले औपचारिक रुपमा पत्र नदिएकाले सेवा शुरु गर्न नसकेकामा पत्र प्राप्त भएसँगै शुरु गरिएको हो ।
साझाले २६ वटा बसमार्फत् काठमाडौँका अधिकांश रुटमा सेवा शुरु गर्न लागिएको हो । पहिलो दिन सरकारले तोकेअनुसार नै सिटभन्दा आधा यात्रु राखेर बस सञ्चालन गर्न लागिएको व्यवस्थापक पाण्डेले बताए ।
बसका कर्मचारी र यात्रु दुवैले आवश्यक सुरक्षाप्रति सर्तक हुने गरी बस सञ्चालन गर्न लागिएको छ । उनका अनुसार यात्रुले साझाका बसमा चढ्दा माक्स लगाउने, सेनेटाइजरको प्रयोग गर्ने र सामाजिक दुूरी कायम गर्नेसँगै खुद्रा पैसा बोकर मात्रै बसमा यात्रा गर्नुपर्छ । उनले भने, “बसका कर्मचारीले पनि माक्स, पञ्जा र सेनेटाइजरको व्यवस्था गरिएको छ ।”
पहिलेकै रुटमा सामान्य अवस्थाभन्दा कम बसबाट सेवा शुरु गर्न लागिएको साझाले जनाएको छ । पहिले थोरै बसबाट शुरु गरिएमा आवश्यकतानुसार थप गर्दै जाने व्यवस्थापक पाण्डेले बताए । सरकारले तोकेअनुसार नै भाडा लिइनेछ ।
विसं २०१९ सालबाट बस सेवा शुरु गरेको संस्थाले विगतमा सबैभन्दा लोकप्रिय सवारी साधन मानिन्थ्यो । विभिन्न समस्याका कारण विसं २०६४ मा अवरुद्ध सेवा विसं २०७० मा पुनः स्थापित भएको हो । काठमाडौँ उपत्यकामा १० रुट रहेकोमा साझाको उपत्यका बाहिर पनि सेवा विस्तार गरेको छ । संस्थाले काठमाडौँ उपत्यकामा अपाङ्तामैत्री सेमी लो फ्लोर बस सञ्चालनमा ल्याएको छ ।
