काठमाडौँ । चीनको जलस्रोत मन्त्रालयले नेपालको छोचेन खोला नदीमा पहिरोले बनाएको ताल आसपासका हिमनदीहरू अझै खस्ने जोखिममा रहेको जनाएको छ।
चिनियाँ सरकारी सञ्चारमाध्यम सीसीटीभी न्युजका अनुसार हिमनदी खस्दा ठूलो सम्भावित जोखिम उत्पन्न हुन सक्ने भएकाले चीनको जलस्रोत मन्त्रालयले घटनासँग सम्बन्धित जोखिमको निरन्तर निगरानी तथा मूल्याङ्कन गरिरहेको छ ।
चीनको दक्षिणपश्चिमी तिब्बत स्वायत्त क्षेत्रको केरुङ काउन्टीमा भएको गेग्रान बग्ने विपद्सँग सम्बन्धित सम्पूर्ण जोखिमबारे मन्त्रालयले निरन्तर परामर्श र चरणबद्ध मूल्याङ्कन गरिरहेको जनाइएको छ।
हालै गरिएको रिमोट सेन्सिङ तस्बिरको तुलनात्मक विश्लेषणअनुसार केरुङ त्साङ्पो नदी बेसिनमा यसअघि पहिचान गरिएका १४ वटा हिमतालको जल सतहमा उल्लेखनीय परिवर्तन देखिएको छैन । ती हिमतालहरू समग्रमा स्थिर अवस्थामा रहेको जनाइएको छ ।
मंगलबार बिहान ८ बजे ड्रोनबाट खिचिएको तस्बिरअनुसार नेपालतर्फ छोचेन खोला नदीमा बनेको तालमा जम्मा भएको पानीको अधिकांश भाग बगिसकेको छ। खाल्डोभन्दा तलतर्फको नदीको बहावसमेत सामान्य अवस्थामा रहेको सीसीटीभीले जनाएको छ।
तर, ताल आसपासका हिमनदीहरू अझै खस्ने जोखिममा रहेकाले थप विपद्को सम्भावना कायम रहेको मन्त्रालयले जनाएको छ।
