बेइजिङ (सिन्ह्वा)। चिनियाँ राष्ट्रपति सी चिनफिङले दक्षिणपश्चिम चीनको सिजाङ स्वायत्त क्षेत्रमा पर्ने केरुङ काउन्टीमा गएको विनाशकारी पहिरोपछि जारी उद्धार तथा राहत कार्यबारे उच्चस्तरीय बैठक गरेका छन्।
चिनियाँ कम्युनिस्ट पार्टी (सीपीसी) केन्द्रीय समितिका महासचिवसमेत रहेका सीले शुक्रबार पार्टी नेतृत्वको बैठकको अध्यक्षता गर्दै उद्धार तथा राहत कार्यलाई प्रभावकारी बनाउन आवश्यक निर्देशन दिएका हुन्।
बैठकले पार्टी केन्द्रीय समितिको नेतृत्वमा आपतकालीन उद्धार कार्य तीव्र, व्यवस्थित र समन्वयात्मक रूपमा भइरहेको जनाएको छ। प्रभावित नागरिकको पुनःस्थापना तथा विपद्पछिको व्यवस्थापनलाई पनि प्राथमिकताका साथ अघि बढाइएको बताइएको छ।
केरुङ क्षेत्र अत्यधिक चिसो पठारी भूभाग, भिरालो खोँच, परिवर्तनशील मौसम, हिमनदी तथा हिमताल र सम्भावित भौगर्भिक जोखिमका कारण उद्धारका लागि चुनौतीपूर्ण रहेको बैठकमा उल्लेख गरिएको छ।
सम्बन्धित सबै निकायलाई प्रभावकारी रूपमा उद्धार कार्य अघि बढाउन निर्देशन दिँदै बैठकले बेपत्ता भएका चिनियाँ तथा विदेशी नागरिकको खोजी तथा उद्धारमा सम्पूर्ण प्रयास गर्न जोड दिएको छ।
नेपाललाई आपतकालीन सहायता
चीनले पहिरोबाट प्रभावित नेपालको क्षेत्रमा आपत्कालीन सहायता उपलब्ध गराउने निर्णयसमेत गरेको छ। साथै, विपद् उद्धारका लागि अन्तर्राष्ट्रिय सहकार्य अघि बढाउने चीनले जनाएको छ।
