बीबीसी । युक्रेनका राष्ट्रपति भोलोदिमिर जेलेन्स्कीले टर्कीमा हुने नेटो शिखर सम्मेलनमा युक्रेनलाई अत्यावश्यक हवाई प्रतिरक्षा प्रणाली उपलब्ध गराउन सदस्य राष्ट्रहरूसँग आग्रह गर्ने भएका छन् । पछिल्ला दिनमा रुसले राजधानी किएभमा गरेको भीषण क्षेप्यास्त्र आक्रमणपछि उनले सहयोगको आवश्यकता झन् बढेको बताएका छन् ।
एक साताभित्र दुईपटक गरिएको रुसी आक्रमणमा किएभका आवासीय भवनहरूमा क्षेप्यास्त्र खस्दा ५० भन्दा बढी सर्वसाधारणको मृत्यु भएको थियो। त्यसपछि जेलेन्स्कीले युक्रेनको सुरक्षा सुदृढ बनाउन आधुनिक हवाई प्रतिरक्षा प्रणाली तत्काल उपलब्ध गराउनुपर्नेमा जोड दिएका हुन्।
शिखर सम्मेलनका क्रममा जेलेन्स्कीले अमेरिकी राष्ट्रपति डोनाल्ड ट्रम्पसँग भेटवार्ता गर्ने अपेक्षा गरिएको छ। उनले रुसी राष्ट्रपति भ्लादिमिर पुटिनमाथि युद्ध अन्त्यका लागि वार्तामा आउन थप अन्तर्राष्ट्रिय दबाब सिर्जना गर्नुपर्ने बताउने तयारी गरेका छन्। जेलेन्स्कीका अनुसार रुसका पछिल्ला आक्रमण शक्ति प्रदर्शन नभई कमजोरीको संकेत हुन्।
यसैबीच युक्रेनले पनि रुसभित्र लामो दूरीका ड्रोन आक्रमण तीव्र बनाएको छ। ती आक्रमणमा तेल प्रशोधन केन्द्र र सैन्य पूर्वाधारलाई निशाना बनाइएका छन्, जसका कारण केही क्षेत्रमा इन्धन अभाव र विद्युत् आपूर्तिमा समस्या देखिएको बताइएको छ।
नेटोका महासचिव मार्क रुट्टेले सदस्य राष्ट्रहरूलाई युक्रेनको सार्वभौमिकता रक्षा गर्न आवश्यक सैन्य सहयोग उपलब्ध गराउन आह्वान गरेका छन्। उनका अनुसार युक्रेनले पूर्वी मोर्चामा रुसी आक्रमण रोक्ने प्रयाससँगै युद्धको रणनीतिक अवस्था परिवर्तन गर्ने संकेत दिएको छ।
युक्रेनले रुसभित्र गरिरहेको ड्रोन आक्रमणले क्रेम्लिनमाथि दबाब बढाएको विश्लेषण गरिएको छ। युक्रेनका अनुसार यसको उद्देश्य रुसलाई सम्मानजनक शान्ति वार्तामा ल्याउनु हो। यद्यपि रुसले अझै पनि पूर्वी डोनबास क्षेत्र पूर्ण रूपमा आफ्नो नियन्त्रणमा आउनुपर्ने अडान कायम राखेको छ।
