जकार्ता। इन्डोनेसियाका उद्धारकर्ताहरूले आइतबार हराएको एउटा सानो यात्रुवाहक विमानको भग्नावशेष पहाडी क्षेत्रमा फेला पारेका छन् । उक्त विमान अघिल्लो दिन खराब मौसम र बाक्लो कुहिरोका कारण दृश्यता घटेको अवस्थामा सुलावेसी टापुको दुर्गम पहाडी क्षेत्रमा दुर्घटनाग्रस्त भएको विश्वास गरिएको छ । प्रारम्भिक जानकारीअनुसार विमानमा ११ जना सवार थिए ।
टर्बोप्रप एटीआर ४२–५०० विमान इन्डोनेसिया एयर ट्रान्सपोर्टद्वारा सञ्चालन गरिएको थियो । यो विमान इन्डोनेसियाको मुख्य टापु जाभास्थित योगाकार्ताबाट दक्षिण सुलावेसी प्रान्तको राजधानी मकस्सरतर्फ उडिरहेको थियो । शनिबार गन्तव्यतर्फ नजिकिँदै गर्दा एयर ट्राफिक कन्ट्रोलले अप्रोच एलाइनमेन्ट सुधार गर्न निर्देशन दिएको केही समयपछि उक्त विमान रडारबाट हराएको थियो ।
उक्त विमानलाई अन्तिम पटक शनिबार दिउँसो ०१ः१७ बजे दक्षिण सुलावेसी प्रान्तको पहाडी जिल्ला मारोसको लेङ–लेङ क्षेत्र वरिपरि ट्र्याक गरिएको थियो । विमानमा आठ जना चालक दलका सदस्य तथा समुद्री मामिला तथा मत्स्यपालन मन्त्रालयका तीन जना यात्रु सवार थिए । ती यात्रुहरू हवाई समुद्री निगरानी मिसनको एक हिस्साका रूपमा यात्रामा रहेको सम्बन्धित अधिकारीहरूले जानकारी दिएका छन् ।
आइतबार बिहान वायु सेनाको हेलिकप्टरमार्फत खटिएको उद्धार टोलीले माउन्ट बुलुसराउङको ढलानस्थित घना वन क्षेत्रमा सानो विमानको झ्याल जस्तो देखिने वस्तु देखेको मकस्सरको खोजी तथा उद्धार विभागका प्रमुख मुहम्मद आरिफ अनवरले जानकारी दिए । त्यसपछि जमिनमा रहेका उद्धारकर्ताहरूले पहाडको उत्तरी ढलानतर्फ विमानको मुख्य धड र पुच्छरसँग मेल खाने ठूला–ठूला भग्नावशेषहरू छरिएका अवस्थामा फेला पारेका उनले पत्रकार सम्मेलनमा बताए ।
“विमानको मुख्य भाग फेला पर्नुले खोजी क्षेत्रलाई उल्लेखनीय रूपमा सङ्कुचित गरेको छ र आगामी खोजीलाई अझ प्रभावकारी बनाउन महत्त्वपूर्ण सुराग प्रदान गरेको छ”, अनवरले भने । उनका अनुसार संयुक्त खोजी तथा उद्धार टोलीहरू अब पीडितहरूको खोजीमा केन्द्रित छन्, विशेष गरी सम्भावित रूपमा जीवित रहन सक्ने व्यक्तिहरूको उद्धारलाई प्राथमिकतामा राखिएको छ ।
दक्षिण सुलावेसीका हसनुद्दीन सैन्य कमान्डर मेजर जनरल बाङ्गुन नवोकले तीव्र हावा, भारी कुहिरो तथा अत्यन्तै ठाडो र दुर्गम भूभागका कारण खोजी कार्य सुस्त भएको जानकारी दिए । यद्यपि, कठिन परिस्थितिका बाबजुद स्थल तथा हवाई उद्धार टोलीहरू आइतबार निरन्तर रूपमा भग्नावशेष स्थलतर्फ अघि बढिरहेका छन् ।
राष्ट्रिय खोजी तथा उद्धार एजेन्सीले आइतबार सार्वजनिक गरेका तस्बिर तथा भिडियोहरूमा उद्धारकर्ताहरू बाक्लो कुहिरोले ढाकिएको साँघुरो र ठाडो पहाडी रिजलाइन हुँदै पदयात्रा गर्दै छरिएका भग्नावशेषसम्म पुग्न प्रयास गरिरहेको देखिन्छ ।
सत्र हजारभन्दा बढी टापुहरू मिलेर बनेको इन्डोनेसिया देशभित्रको आवागमनका लागि हवाई यातायात तथा जल यातायातमा अत्यधिक निर्भर छ । दक्षिणपूर्वी एसियाली यो मुलुक हालका वर्षहरूमा विमान तथा बस दुर्घटनादेखि लिएर फेरी डुब्ने घटनासम्म विभिन्न यातायात दुर्घटनाबाट पटक–पटक प्रभावित हुँदै आएको छ ।
