काठमाडौं । संसदको राज्य व्यवस्था तथा सुशासन समितिको सभापतिबाट राजीनामा दिएका कांग्रेस सांसद रामहरि खतिवडा संसदीय सुनुवाइ समितिको सदस्य बनेका छन् ।
शुक्रबार बसेको प्रतिनिधिसभाको बैठकले खतिवडाको नाम अनुमोदन गरेको हो । सुनुवाइ समितिकी सभापति ईश्वरी न्यौपाने राजीनामा दिएर सुशासन समितिको सभापति बनेपछि एक सदस्य पद रिक्त भएको थियो । उक्त रिक्त सदस्य पदमा खतिवडाको नाम अनुमोदन भएको हो ।
खतिवडा सुशासन समितिको सभापति हुँदा संघीय निजामती सेवा विधेयकमा भएको कुलिङ पिरियडको व्यवस्था हेरफेरमा चलखेल गरेको आरोप लागेको थियो । त्यसपछि छानबिन गर्न बनेको समितिले उनलाई जिम्मेवार ठहर गरेको थियो । त्यसपछि खतिवडाले सभापतिबाट राजीनामा दिएका थिए ।
