बीबीसी । युक्रेनको राजधानी किभमा रूसी आक्रमणबाट कम्तीमा २३ जनाको मृत्यु भएको छ। मृतकमध्ये चार जना बालबालिका रहेका छन् भने दर्जनौं घाइते भएका छन् ।
बिहीबार बिहान करिब ३ बजे भएको मिसाइल आक्रमणमा दक्षिण–पूर्वी दार्नित्स्की जिल्लास्थित पाँच तले आवासीय भवन ढलेको युक्रेनी अधिकारीहरूले जनाएका छन् । आक्रमणमा युरोपेली संघको प्रतिनिधि कार्यालय र नजिकैको ब्रिटिश काउन्सिल भवनसमेत क्षतिग्रस्त भएको छ ।
युरोपेली संघकी कार्यकारी अध्यक्ष उर्सुला भोन डेर लेयेनले रूसी मिसाइल कूटनीतिक कार्यालयदेखि ५० मिटरमै खसेको भन्दै आक्रोश व्यक्त गरेकी छन् । युक्रेनी सेनाका अनुसार रूसले यस आक्रमणमा करिब ६ सय ड्रोन र ३० भन्दा बढी ब्यालिस्टिक तथा क्रुज मिसाइल प्रहार गरेको छ।
