काठमाडौं । भुटानमा जारी साफ यु-१७ महिला च्याम्पियनसिप अन्तर्गत भएको आफ्नो चौथो खेलमा नेपाल पराजित भएको छ । बुधबार दिउँसो भएको खेलमा बंगलादेशसँग ४-१ गोलले पराजित हुँदै नेपालले प्रतियोगितामा तेस्रो हार बेहोरेको हो ।
चाङलिमिथाङ स्टेडियममा भएको खेलमा बंगलादेशलाई जित दिलाउन सौरभी अकान्डा प्रितीले ह्याट्रिक पूरा गर्दा थुइनुए मर्माले एक गोल गरिन् । नेपालको लागि भूमिका बुढाथोकीले एक गोल फर्काइन् । खेलको ३९ औँ मिनेटमा मर्माले गोल गर्दै बंगलादेशलाई शुरूवाती अग्रता दिलाएकी थिइन् ।
पहिलो हाफको इन्जुरी समयको पहिलो मिनेटमा सौरभीले गोल गर्दै बंगलादेशको अग्रता दोब्बर बनाएकी थिइन् । दुई मिनेटपछि भूमिकाले गोल गर्दै नेपाललाई २-१ गोलको स्थितिमा ल्याइन् । ७१ औँ मिनेटमा सौरभीले व्यक्तिगत दोस्रो गोल गर्दै बंगलादेशलाई ३-१ गोलको अग्रता दिलाएकी थिइन् ।
यस्तै ८७ औँ मिनेटमा सौरभीले व्यक्तिगत तेस्रो गोल गर्दै ह्याट्रिक पूरा गरेर बंगलादेशलाई ४-१ गोलको जित दिलाएकी हुन् । जितसँगै बंगलादेशले फाइनलमा आफ्नो स्थान सुरक्षित गरेको छ । यता नेपालको भने फाइनल पुग्ने सम्भावनामा पूर्णविराम लागेको छ ।
हाल बंगलादेश ४ खेलबाट ९ अंक जोड्दै तालिकाको दोस्रो स्थानमा रहेको छ भने समान खेलबाट तीन अंक जोडेको नेपाल तेस्रो स्थानमा रहेको छ ।
