काठमाडौं । संसदको राज्य व्यवस्था तथा सुशासन समितिको सभापतिमा नेपाली कांग्रेसकी सांसद ईश्वरीदेवी न्यौपाने सर्वसम्मत निर्वाचित भएकी छन् । मंगलबार दिउँसो १ बजेदेखि ४ बजेसम्म उम्मेदवारी मनोनयनको तालिका थियो । सभापतिका लागि न्यौपानेको मात्र उम्मेदवारी परेकाले उनी सर्वसम्मत निर्वाचित भएकी हुन् ।
संघीय निजामती सेवा विधेयकमा कुलिङ पिरियडको प्रावधानको विषयमा चलखेल भएपछि तत्कालीन सभापति रामहरि खतिवडाले पदबाट राजीनामा दिएका थिए ।
समितिको बुधबार बस्ने बैठकमा प्रस्तावकले एक मात्र प्रस्ताव परेको जानकारी दिएपछि उनी निर्विरोध भएको घोषणा गरिने छ । नेपाल विद्यार्थी सङ्घबाट राजनीति सुरु गरेकी न्यौपाने हाल पार्टीको केन्द्रीय सदस्य छिन् । यसअघि उनी दुवै संविधानसभामा सदस्य थिइन् भने पार्टीका तर्फबाट संसदीय दलको सचेतकको भूमिका निर्वाह गरिसकेकी छन् ।
पार्टीमा महिला विभाग प्रमुख भइ जिम्मेवारी सम्हालेको अनुभव पनि उनीसँग छ । न्यौपानेले संसदीय सुनुवाइ समिति सभापति थिइन् । तर उनले आजै सभामुखलाई भेटेर राजीनामा बुझाएकी थिइन् ।
